Chubato Beer World ta un concepto unico di cerbes

ORANJESTAD, Aruba

situa den centro di Oranjestad, den caya principal. E ta un concepto unda ta ofrese mas cu 250 tipo di cerbes, local y internacional. E ta inclui nos cerbesnan local, tur esunnan cu nos pueblo di Aruba ta custuma cu ne, pero tambe un surtido grandi di diferente Craft beer, Dark beer, IPA’s, cu diferente % di alcohol. Mescos cu ta experiencia un binja, nos kier pa bo por haya un experiencia unico di cerbes den tur sentido di palabra, un “beer experience”.

Chubato Beer World a habri su porta yen positivismo, durante pandemia,, unda cu a draai poco limita a consecuencia di tur e restriccionnan di Covid. Ora mercado a habri y restricionanan a baha, por a mira un necesidad di algun cambio, asina por acomoda mas cliente y amantenan di cerbes. Pa es motibo, nos a sera pa 2 siman, y haci un renobacion chikito. Prome cos cu nos a haci ta amplia nos surtido di cerbes pa mas cu 250 tipo di cerbes. Cambionan cu a tuma paden e lugar ta entre otro cu nos a haci e lugar dobbel mas grandi. A cuminsa cu 4 mesa, pero cu e cambio awor nos tin lugar pa 13 mesa. Tambe, awor nos ta trese nos “live” music paden, unda cu nos tin un “mini stage” pa musiconan por duna presentacion en bibo. Tambe nos a amplia nos menu di cuminda cu un surtido mas grandi di “bar food” traha den nos cushina. Awor tambe nos tin 4 TV grandi pa por stream deporte of otro evento. Addicionalmente, awor nos tin un mesa di billiard y un area pa por haci e deporte di “Dart”. Nos orario nobo ta bira como lo siguiente: den siman dialuna pa diahuebs, for di 12 merdia pa 12 di anochi. Riba diabierna y diasabra, nos orario ta for di 12 merdia pa 1am. Diadomingo nos ta habri pa eventonan special.  Awor, Chubato Beer World a bira e lugar pa “eat, drink & play”.

Diabierna 17 y Diasabra 18 di Juni nos lo habri official bek pa publico. Como gesto special pa nos comunidad, nos lo destina 10% di nos benta di e dos dianan aki pa un fundacion. E fundacion aki ta Stichting Adopt an Addict, cu ta haci su esfuerso pa yuda cu un otro problema grandi cu centro di cuidad ta sufri di dje, esta addiccion y addictonan ambulatorio (chollers) . Lo tin un box obtenibel tambe pa donacionan direct pa e fundacion.

Situa den caya principal di Oranjestad, dilanti Plaza Niki Habibe, Chubato  Beer World ta forma parti di e renobacion cu companianan priva ta hacienda den centro di cuidad, cu negoshinan innovativo,  unico cu mester bay hunto cu e cambio cu ta tumando lugar den nos mercado y mercado internacional.  Y particularmente, e cambio cu mester tuma lugar den caya principal. E idea bieuw di “retail” so, no ta funciona mas. Entre otro mester bin mas  lugarnan di “food and beverage” , night live, pero combina cu retail,  bibienda, cu apartments, studios etc… Y asina tambe trese un control social den e area. Pero, regla mento y permisonan mester bira hopi mas alcansabel pa e propositonan aki, y a cu e burocracia pa yega na, entre otro un simple restaurant vergunning, y tambe un precario Vergunning ta increibel y ta dura mucho hopi. No ta pidi versoepeling, pero ta pidi hopi mas efficiencia den tur e processonan aki.

Tieleman Enterprises VBA ta sigui sostene y ta keda positivo den e potencial di nos Caya Principal. Un caya bunita, cu hopi oportunidad pa hopi tipo di actividad economico. Ta asina mes, nos compania ta sigui cu ideanan unico y hunto cu Chubato Beer World, tambe a desroya  otro concept stores den e mesun edificio, entre otro Holland Roots, In Bloom Studio, y tambe Coffee Break y Aruba Coffee Roasting Company, tur haciendo e experiencia di bin shop den Caya bek mas atractivo, y “the place to be”.