Minister Xiomara Maduro tabata presente na e apertura di Weganan Escolar WE Aruba

ORANJESTAD, Aruba

Siman pasa diabierna tabata e apertura di e Weganan Escolar WE Aruba. Tabata un atardi bunita na unda e hobennan di diferente scol a forma parti di un defile y tambe duna presentacion pa asina duna apertura na e Weganan Escolar.

Minister Maduro tabata tin e placer di por a presencia un atardi energetico y positivo na unda cu e hobennan tabata e centro di atencion, mustrando nan banda competitivo pero alabes e union cu ta reina entre e muchanan. Algo cu sigur nos tur por tuma como ehempel ora ta trata eventonan positivo pa nos muchanan y nos pais.

‘E miho parti ta cu por medio di competencia nos ta descubri nos capacidad como persona y hunto cu otro nos por logra hopi mas cu nos mes ta kere’ tabata palabranan di e mandatario na e ocasion aki. Minister Maduro ta gradici colega Minister Endy Croes y su team pa e tremendo iniciativa pa organisa e Weganan Escolar atrobe na bienestar di nos hobennan. Masha danki na Departamento di Cultura, specialmente Jhon Freddy Tobón Montoya y Comision CCDN, cu a percura pa e show y tambe pa asisti e invitadonan riba e atardi aki. Minister Maduro ta desea tur hoben participando den e Weganan Escolar, WE Aruba, tur clase di exito.

FIN

2022JUNI20-03