Tools pa e Mentor
ORANJESTAD, Aruba
Educacion ta un di e pilarnan mas importante pa loke ta e manera di opera di Fundacion Telefon pa Hubentud Aruba. Esaki ta encera cu tur aña e mentornan cu ta e personanan cu ta contesta telefon, email y chat na Telefon pa Hubentud ta ser prepara pa asina aki por duna nos muchanan y hobenanbon guia, sosten y informacion. Tur aña Fundacion Telefon pa Hubentud Aruba ta brinda nan mentornan tres dia di educacion.
E aña aki no tawata otro. Ariba diasabra 18 di juni Fundacion Telefon pa Hubentud Aruba a organisa ‘Deskundigheidsbevordering Dag 2022, Tools voor de Mentor’ pa e mentornan. Durante ‘Deskundigheidsbevordering Dag 2022, Tools voor de Mentor’ e mentornan a ricibi diferente informacion, conocimento y preparacion.
Primeramente a trata e modelo di combersacion cu ta ser implementa na Telefon pa Hubentud pa hiba un combersacion cu un mucha/ hoben. Tambe a para keto na algun instumento di ‘Signs of safety’ cu ta ser implementa den e modelo di combersacion cu ta ser uza na Fundacion Telefon pa Hubentud Aruba. E mentornan a ricibi informacion tambe tocante tecnicanan di scucha y hiba un combersacion.
Pa por duna sosten, ayudo y informacion na nos muchanan y hobenan ta importante pa e mentor tin mas conocemento ainda di e mente di un persona y e motibo di un conducta. Sr. Eddy Oduber di Aruba Hypnosis Center a trata e mente conciente y e mente subconciente. Aki e mentor a ricibi conocimento tocante e diferencia entre nan dos, cua di nan ta zorg pa cierto conducta y kiko ta frena un persona di implementa cierto conducta.
Expresa cu movecion a ser presenta pa sra. Raquel Lampe. Durante expresa cu movecion a ser ilustra por medio di arte na e mentor con comunicacion na pia di trabao ta importante, y si no tin comunicacion lo tin caos.
