St. Paulus School cu bunita proyecto di conscientisacion pa polucion
ORANJESTAD, ARUBA
“Esta dushi biba riba un isla sin sushi”. Esey ta e mensahe principal cu hobennan di St. Paulus School kier a manda pa comunidad di Aruba a traves di un cancion cu nan a traha. Durante un bishita diaranson mainta, Minister di Naturalesa, Sr. Ursell Arends a ricibi un presentacion di e proyecto cu muchanan a termina.
E proyecto aki a enfoca riba con nan por contribui positivamente na nos planeta, y nos isla. “Un isla sin sushi ta algo henter Aruba kier mira, y e ta rekeri esfuerso di hoben y adultonan”, minister Arends a comenta.
Durante un periodo di 6 siman, e muchanan di 3de klas a bishita diferente sitionan cu ta causa polucion, y a identifica esakinan como fuentenan di sushedad di aire, tera y awa. Asina for di un edad hoben ta crea conscientisacion pa e retonan di desperdicio y e esfuerso necesario cu nos tur mester desplega pa haci e miho di nos parti, manera reduci of reuza.
Minister Arends a keda sumamente contento cu e research y plan cu a ser presenta, y ta spera cu lo continua di tin mas iniciativa similar cu ta sigui stimula y motiva nos hobennan, y tambe nos adultonan den nan rol pa Aruba su maneho di desperdicio.
