Prome Minister Evelyn Wever-Croes: Reunion cu CFT, Gobierno di Aruba ta comprarti preocupacionnan di CFT
TA DELIBERANDO CUAL TA E FORMA MAS RESPONSABEL Y DURADERO PA NOS SALI DI E DEBE NACIONAL
Diahuebs 23 di juni atardi, Gobierno di Aruba a reuni cu e College Financieel Toezicht, CAFT. Henter e Colegio di supervision ta na Aruba como tambe e Secretariado. Prome Minister Evelyn Wever-Croes tawata tin un reunion separa tambe cu Presidente di CFT, señor Gradus.
Prome Minister a indica cu e reunion a cana bon y ameno apesar cu ta den momentonan hopi dificil y critico pa loke ta trata e finansas publico di Pais Aruba. Reunion importante manera esunan cu a tuma luga dialuna atardi, semper ta yuda pa yega na palabracionnan mas concreto.
Di parti di CFT, nan a trece nan preopacionnan dilanti. E debe di pais ta keda un punto di preocupacion di CFT y esaki sigur, Prome Minister a enfatisa, ta un preocupacion cu Gobierno di Aruba ta comparti. Un punto cu CFT a trece dilanti tocante e debe ta cu nan kier pa Aruba cuminsa baha e debe mas lihe. Pa esaki, Aruba mester cuminsa crea surplus.
“Nos tambe ta kere cu nos mester crea surplus y baha nos debe. Sinembargo, ta necesario pa tuma un tempo pa recupera. Pasobra na e momento aki, nos pueblo ta pasando den hopi dificultad caba”, Prome Minister a expresa.
Prome Minister a duna di conoce cu si Aruba sigui recomendacionnan di CFT di baha debe mas tempran, lo mester bin cu mas medida y corta hopi mas gasto den entidadnan manera Cuerpo Policial, den Enseñansa entre otro, y of den tur servicio basico cu Gobierno ta duna. Di parti di Gobierno di Aruba, a indica na CFT cu Gobierno kier tambe yega na surplus pero na un forma responsabel y sostenibel. Riba e punto aki, lo sigui delibera cual ta e forma mas responsabel y duradero pa nos sali di e debe nacional.
Prome Minister a informa cu Gobierno a pidi IMF yuda den e discusion aki y indica loke nan ta mira cu Aruba mester logra na surplus y pa cuminsa paga e debe. Cu e raport di IMF hunto cu CFT, lo yega na un maneho financiero nobo pa paga debe di nos pais.
CFT a indica su preocupacion tambe pa loke ta trata gastonan di cuido y a pidi Gobierno un biaha mas pa introduci ‘eigen bijdrage’ y e positieve lijst. Gobierno a splica cu e positieve lijst ya ta hopi avansa. Y tambe Gobierno a indica na CFT cu pa loke ta trata e eigen bijdrage, esaki awo ta dificil den e tempo dificil cu Aruba ta pasando aden.
No solamente CFT ta preocupa cu e debenan haci door di Covid, sino e debenan di e PPP proyecten cu ta proyectonan, manera conoci, di e gobierno anterior di otro asignatura. E debe aki di PPP, ta pone cu cada aña e pueblo di Aruba mester paga riba 100 miyon florin.
“Manera nos sa, cu esakinan ta e debenan cu a keda scondi pasobra nunca e gobierno anterior tawata kier pa nan pone riba e debe di Aruba. Pero awo CFT kier pa tene cuenta cu esaki y pone atencion riba e tema aki. Diferente otro tema tawata puntonan di discucion na unda cu a yega na bon palabracionnan riba con lo sigui comunica cu otro, intercambia informacion cu otro y yega na miho comprendemento mutuo.
CFT ta un consehero di pais Aruba riba e tereno financiero. Gobierno di Aruba ta aprecia e consehonan apesar cu no ta tur ora por cumpli cu nan. Gobierno awo mester contesta algun carta, pa cual a haya algun dia adicional pa haci esaki. Gobierno lo sigui den e procesonan normal y legal, pero cu un miho comprendemento di e situacion di Aruba. y pa esaki mi ta hopi agredecido”, Prome Minsiter Evelyn Wever-Croes a duna di conoce.
