Eleccion 2021, Un aña pasa; CU BO ARUBA TA AVANSA

Cu e slogan aki partido MEP a bay eleccion 2021. Lider di partido Evelyn Wever-Croes a lidera un ekipo di candidatonan representando experiencia y cara nobo, tur cu un base social democrata solido. Candidatonan cu e pasion pa haci e diferencia, pa Aruba por avansa.

Y e resultado di Eleccion 2021 a duna partido MEP e mandato un biaha mas. 20.701 voto y asina MEP a bira e partido mas grandi un biaha mas.

Apesar cu Partido MEP no a crece den voto, e partido a mantene su 9 asientonan, y lider di partido MEP señora Evelyn Wever-Croes a ricibi confiansa di 7.518 votado, haciendo e VOTEGETTER di Eleccion 2021.

E partido di dos mas grandi, AVP, a saca 18.348 y a cay di 9 pa 7 asiento.

Partido MEP despues di eleccion a drenta den e etapa di formacion cu partido RAIZ, cu a saca 2 asiento den Eleccion 2021.

Den e aña tras di lomba, e prome 3 lunanan partidonan MEP y RAIZ a traha riba formacion di un gobierno nobo. Nan a delibera cu mas di 100 stakeholder, den tur transparencia. Cada stakeholder a duna un declaracion den conferencia di prensa despues di nan reunion y asina henter comunidad por a sigui e proceso di formacion.

E gobierno nobo, Gabinete Wever-Croes 2, a huramenta dia 20 di september 2021.

Den e 9 lunanan cu a sigui, e 8 ministernan di Gabinete Wever-Croes 2, a enfrenta reto tras di reto, mientras mes momento tras riba un vision pa Aruba por avansa. Saliendo di e pandemia tur esfuerso ta dirigi riba recuperacion economico y financiero di nos pais. Mes momento organisa y ordena con e desaroyo mester ta, treciendo desaroyo den balance cu medio ambiente.

Bou Gabinete Wever-Croes 2, Aruba a cuminsa sali di e pandemia, pero awor ta wordo menasa pa e guera di Ukraina cu a causa inflacion den henter mundo. Aruba no ta un excepcion. Prijs di gasolin y crudo a aumenta drasticamente den tur pais, na Aruba tambe. Y esaki ta trece mas reto cu ne.

Di otro banda Gabinete Wever-Croes 2 ta brindando perspectiva tambe. Tin hopi cupo di trabou nobo den sector hotelero y di construccion. Esnan cu ta traha den Gobierno y esnan cu ta traha den fundacionnan social cu ta haya subsidio di Gobierno, nan tin perspectiva cu lo haya aumento di salario cu 5% entrante otro luna. E relacion cu Hulanda ta hopi mas miho y e caminda a habri pa un otro alternativa pa e ley di reino COHO.

Partido MEP a compromete cu lo traha pa Aruba avansa y cada integrante di partido ta haciendo su maximo esfuerso pa logra esaki, apesar di tur e retonan cu ta crusa den nan caminda. Partido MEP ta gradici tur sostenedo y henter e pueblo di Aruba pa e confiansa. Nos lo no defrauda e confiansa aki!