PREMIER WEVER – CROES A RICIBI PRESENTACION DI LEERORKEST NA PRINCESS AMALIA BASISSCHOOL

ORANJESTAD, Aruba

E siman a habri cu un bishita di Prome Minister na Princess Amalia Basisschool caminda cu presencia un bunita presentacion di leerorkest.  Leerorkest ta un proyecto entre Minsiterio di Enseñansa, Ministerio di Husticia y Hulanda, enfoca riba inculca e amor y pasion pa musica den muchanan di edad chikito caba.

Premier Wever – Croes a expresa cu a mira muchanan di 2de, 3de y 4de klas cu instrumentonan cu diferente instrumento cu normal bo no ta haya, pero cu e muchanan a siña conoce y descubri un pasion pe. Esey ta algo hopi bunita, Prome Minister a expresa. “Mas trempan nos laga nos muchanan cera conoci cu musica, mas trempan den bida nan por insipra pa musica y esey por yudanan pa ta exitoso tambe den futuro.”

Termindando Prome Minister a gradici Princess Amalia Basischool y leerorkest pa tur e empeño hinca den e trabou. Ta mira cu hopi pasenshi y hopi ora di trabou a bay den e proyecto aki. “E ta inmensamente bunita pa mira kico tur e muchanan a presenta. Un pabien y danki pa expresa amor y dedicacion na nos muchanan.”