Minister Rocco Tjon: TRABOUNAN PA CU STICHTING HUNTO TA AVANSANDO Y PRONTO E EDIFICIO LO KEDA CLA

ORANJESTAD, Aruba

Siman pasa, Minister di Husticia y Asuntonan Social Sr. Rocco Tjon a bishita e sitio caminda ta construyendo e edificio nobo pa loke ta “stichting hunto” y a haya un bista di con e trabounan ta avansando. Ta trata aki di e proyecto caminda ta bay uni e dos instancianan esta; FMAA y SPD, pa asina atende mucho mas miho cu varios retonan den cuadro di salud mental y adiccion.

Den presupuesto 2022 a tene cuenta cu e proyecto aki caminda tur e fondonan ta bay wordo poni hunto, pa di e forma ey por haci mucho mas cu e recursonan limita cu tin. Door di uni e dos instancianan, e ta percura pa brinda henter comunidad un miho servicio, pero tambe e lo percura pa procesonan ta mas miho alinea na otro pa trata cu e tematicanan di salud mental y adiccion. Recientemente, hunto cu colega Minister di Finansa y Cultura Sra. Xiomara Maduro, a firma e carta di oferta pa Gobernador, pa asina e landsbesluit por wordo concretisa pa asina tur e fondonan, pues 2.6 miyon florin por wordo traspasa pa FMAA, pa di e forma ey por bay brinda un miho servicio.

Manera ta conoci, ya caba a bishita SPD hunto cu Minister di Desaroyo Social di Sint Maarten Sr. Ottley kende a haya un bista y un splicacion amplio di con ta atende cu e parti di salud mental y adiccion na Aruba. E tema aki tin e atencion desde inicio di Gabinete Wever-Croes, caminda hunto cu Prome Minister Sra. Evelyn Wever-Croes a ehecuta e Sociaal Crisis Plan, pa atende cu loke ta e lista di espera di salud mental. Bisando esaki, e proyecto aki tambe ta cay den cuadro di e maneho pa cu salud mental. Manera a bin ta compronde di e raad van toezicht di FMAA, dentro di poco e fundeshi lo ta cla pa por pone e prome bloki, pa asina stichting hunto por bira un realidad. Ta premira cu lo termina e proyecto aki, na inicio di 2023.