BOLETIN CODICO CORA!

ORANJESTAD, Aruba

Gobierno di Aruba cu Crisis Team a emiti un boletin tocante pronostico di tempo relaciona cu tormenta tropical potencial (Two).

E ola tropical cu un area di presion riba Ocean Atlantico tin 70% chens di desaroya su mes den un tormenta tropical pa mañan. E tormenta su centro di circulacion lo por pasa entre Aruba y Venezuela. E parti zuid di Aruba lo sinti e efecto nan potencialmente den curso di diaranson atardi entre 6or te cu diahuebs durante henter e dia.

E boletin ta valido te cu proximo aviso. Mirando e direccion di e sistema tropical por spera desde diaranson te cu diabierna, yobida fuerte compaña pa strena y lamper, biento modera te fuerte y lama bruto na Savaneta, Zeewijk, Mangel Halto y banda di area di hotel.

Servicio Meteorologico (Meteo) a emiti un alerta di tormenta tropical (tropical storm watch) y lo monitor e sistema di cerca pa desaroyonan y lo informa pueblo por medio di boletin di noticia di e ultimo desaroyonan pa loke ta trata condicion y pronostico di tempo.

Instancianan di gobierno, manera Departamento di Obra Publico, Brandweer y Polis lo monitor e situacion pa duna ayudo en conexion cu inundacion den algun bario di e isla.

Minister Oduber ta urgi pueblo pa tene cuenta cu esaki y sigui boletinnan oficial di gobierno tocante tempo di cerca. Gobierno, Crisis Team y Servicio Meteorologico Aruba ta den contacto cu servicio meteorologico den region,  National Hurricane Center na Miami y e KNMI na Hulanda.

Por ultimo minister Oduber ta conseha pueblo pa prepara nan mes adecuadamente, sigui conseho di instancia nan y no pone bo mes of otro na riesgo.