Salud

HOH cu informacion importante den cuadro di Tropical Storm Warning

ORANJESTAD, Aruba

Advertisements

Manera boso ta na altura tin pa Aruba un asina yama Tropical Storm Warning y ta spera yobida fuerte cu lo cuminsa diaranson rond 6or di atardi. Y ta pronostica tambe cu esaki lo sigui riba diahuebs proximo. Crisisteam HOH ya ta algun dia bezig cu preparacionnan riba tur front pa asina salvaguardia siguridad di nos pashentnan, coleganan y bishitante. Ta reuni regularmente pa asina keda monitor e situacion di cerca y tuma decisionnan cu siguridad di un tur na prome luga.

Algun decision pa loke ta cuido di nos pashentnan mester a wordo tuma como precaucion. Nos ta lamenta esaki y ta pidi di un tur compresnion mirando cu ta un situacion cu no ta den nos man. Tene bon na cuenta lo siguiente:

  • Tur pashent cu tin un operacion planea riba diahuebs, 30 di juni ta wordo cancela. Lo yama e pashent directamente y traha un cita nobo mas lihe cu ta posibel.
  • Tur pashent cu tin cita diahuebs y diabierna awo na policlinicanan y tambe na e departamentonan diagnostico manera Radiologia, Functiekamer etc. ta wordo cancela. E pashent lo haya un cita nobo mas lihe cu ta posibel.
  • Dialisis si ta sigui normal pa tur nos pashentnan.
  • Testcenter HOH ta muda y lo ta diahuebs y diabierna awo den wachtkamer di MOB, situa riba prome piso pa brinda servicio.
  • Recomendacion urgente ta bay na tur bishitante/ famia pa no bin Hospital pa bishita ni diaranson anochi ni diahuebs durante dia. Purba di haci mas cu por uzo di telefon priva, videcalling etc. pa keda den contacto cu e pashent admiti den Hospital.
  • Departamento di Emergencia di HOH ta habri pa cualkier emergencia 24/7 pero ta pidi un y tur pa si e caso no ta undo di urgencia acudi cerca bo dokter di cas.

Crisisteam, staf y coleganan di HOH ta desea di trankilisa un y tur cu Hospital ta bezig cu e preparacion necesario. Como TEAM HOH den pasado nos a yega di pasa den situacionnan asina y semper nos a keda brinda e cuido necesario na nos pashentnan y alabes semper ta cuida otro como colega. Pa cualkier informacion por subi medionan social di Hospital unda lo keda mantene comunidad di Aruba al tanto di tur e ultimo desaroyonan.


FIN