Cft: “Probecha di e recuperacion economico di Sint Maarten pa pone e presupuesto na ordo”

ORANJESTAD, Aruba

Pa aña 2022 por spera den e presupuesto di Sint Maarten un deficit presupuestario considerabel, a pesar di un crecemento economico real di 7,5 porciento. Colegio di supervision financiero di Corsou y Sint Maarten (Cft) ta urgi Sint Maarten pa, na termino cortico, limita su gastonan y aumenta su entradanan fiscal mediante tumamento di medida di incremento di cumplimento, y recaudacion di e canonnan di erfpacht y di e cuotanan di licencia di casino y di loteria. Ta di importancia pa un serie di inversion specifico tuma luga tambe.

Economia di Sint Maarten a crece cu 8 porciento na 2021. Pa aña 2022 Fondo Monetario Internacional (FMI) ta spera un crecemento di 7,5 porciento. Pa gran parti esaki ta debi na e recuperacion di turismo (di crucero). Sint Maarten lo mester probecha di e recuperacion economico aki pa pone su finansa publico na ordo, cumpli cu su obligacionnan di pago y realisa e inversionnan necesario.

Presupuesto 2022 y 2023

E presupuesto aproba pa 2022 a mustra un deficit di ANG 124 miyon den servicio ordinario. Cft a conseha Sint Maarten pa reduci e deficit door di limita e gastonan y aumenta e entradanan fiscal. Como resultado un deficit di mucho menos di ANG 100 miyon na 2022 ta concebibel. Na 2023 un balans den servicio ordinario lo mester ta posibel, sigui pa surplus for di 2024. Relevante al respecto ta cu Sint Maarten mester amortisa un prestamo di ANG 73,5 miyon na 2025. E inversionnan specifico por contribui na un crecemento economico sostenibel. Sint Maarten mester probecha di e oportunidadnan cu e Pakete di Medida (Landspakket) ta ofrece al respecto y hustifica e inversionnan previsto suficientemente. Den tal caso mester indica cua ta e efectonan di e inversionnan riba e presupuesto plurianual.

Aumento di entrada fiscal

Mira for di un punto di bista internacional e entradanan fiscal di Sint Maarten, di aproximadamente 17 porciento di e Producto Interno Bruto (PIB), ta abou. Sint Maarten mester eleva su entradanan fiscal na un nivel mas halto, pa esakinan cubri e gastonan anual y genera surplus. Cft ta conseha Sint Maarten pa implementa diligentemente e recomendacionnan relaciona cu introduccion di un impuesto riba casino y ampliacion di e impuesto di hospedahe riba huurmento di vivienda na turista. Tambe ta notabel cu Sint Maarten no ta cobra impuesto riba bien inmobil. Modernisacion di e sistema fiscal y di Servicio di Impuesto ta necesario pa mehora cumplimento.

Control di e areglo di subsidio di salario

Dia 30 di april 2022 Organo Ehecutivo di Seguro Social di Malesa (SZV) a finalisa control di ehecucion di e areglo di subsidio di salario di 2020 y 2021. Te na e momentonan aki SZV a paga ANG 95 miyon na subsidio di salario. Di e control efectua por deduci cu probablemente a paga na total ANG 0,7 miyon na subsidio di salario di forma indebido. Cft a pidi Ministro di Finansa pa amplia control riba varios parti.

Cuido y seguridad social

Salud financiero di e Fondo di Malesa/Fondo di Accidente (ZV/OV) y di e Fondo di Malesa di Pensionado Publico (FZOG) na Sint Maarten ta preocupante. E surplusnan di otro fondo, particularmente esun di Seguro General di Behes (AOV-fonds) ta absorba e deficitnan di e fondonan ey. Na 2022 Sint Maarten a dal e prome pasonan relaciona cu implementacion di economisacion. Ta implementando legislacion tocante introduccion di remedi generico. Cu esaki por economisa aproximadamente ANG 6 miyon pa aña. Tambe ta di importancia cu austeridad pa remedi sin recept ta tumando luga. Tambe na cuminsamento di 2022 Parlamento di Sint Maarten a aproba legislacion relaciona cu aumento di e limite salarial di ZV/OV na ANG 120.000. Durante e combersacionnan Cft a enfatisa importancia di implementacion rapido di e legislacion ey.

Maneho financiero

Maneho financiero di Sint Maarten ta faya gravemente. E calidad di e cuentanan anual ta refleha esey. Den e Pakete di Medida (Landspakket) y den e agenda di ehecucion subyacente a acorda medida pa mehoracion di e maneho financiero. Cft ta considera prudente cu Sint Maarten a cuminsa cu ehecucion di trayectonan di mehoracion.

E miembronan di Cft a combersa dia 27 y 28 di juni 2022 cu Gobernador, Conseho di Ministro, Ministro di Finansa y e Comision Financiero di Parlamento di Sint Maarten. Cft a combersa tambe cu Sint Maarten Medical Center (SMMC) y Sint Maarten Harbour Holding Company N.V. (SMHHC). Dia 27 di juni 2022 Cft di Boneiro, Sint Eustatius y Saba a combersa virtualmente cu Colegio Ehecutivo di Saba.

Dia 28 di juni 2022 Presidente di Cft a tene un charla na Sint Maarten titula: “Sint Maarten’s Road to Sustainable Public Finances”. Tanto e texto papia como e slidenan ta disponibel via www.cft.cw.

[Fin di e Comunicado di Prensa]

Potret: Edgardo Lynch   Texto na e potret: Cft a conseha Sint Maarten pa reduci e deficit door di limita e gastonan y aumenta e entradanan fiscal.   Nota pa redaccion – no pa publicacion Persona di contacto na Cft: Secretariado di e Colegionan di supervision financiero Telefon +5999 461-9081 / +5999 461-9082 / +5999 461-9084 Email info@cft.cw Website www.cft.cw   Persona di contacto cu Prensa: Jefka Alberto Telefon +5999 512-6861