Den un carta dirigi na Sindicato SIMAR, PROME MINISTER TA CONTRA-ARESTA NAN 4 PUNTO DI MAL CONTENTO

ORANJESTAD, Aruba

Prome Minister Evelyn Wever-Croes, diahuebs a ricibi un carta di e sindicato di enseñansa, SIMAR relaciona cu cuatro punto di mal contento den e sector di enseñansa. Prome Minister a contesta e carta mesora indicando tambe cu e ta considera cu ta importante pa contra-aresta esakinan inmediatamente.

AUMENTO DI TARIFA DI AWA:

Presidente di Sindicato SIMAR, señora Josephine Albertus a elabora riba e aumento di tarifa di awa, expresando cu den e veld di enseñansa tin preocupacion cu e aumento di tarifa manera cu WEB a anuncia diahuebs mainta, lo ta devastador pa hopi famia. Ademas di esaki, señora Albertus a keha cu SIMAR no a wordo envolvi ni informa adelanta riba e aumento di tarifa aki.

Riba esaki, Prome Minister a informa señora Albertus di SIMAR, cu mescos cu señora Albertus, diahuebs mainta, 30 di juni, Gobierno di Aruba desagradabelmente a wordo sorprendi cu e anuncio di WEB pa hisa tarifa di awa sin cu esaki tawata tin aprobacion di Gobierno siendo cu Gobierno ta na mesa di negosacion cu WEB y Elmar riba e topico aki.

Prome Minister a informa señora Albertus tambe cu Minister di Energia, señor Glenbert Croes ta trahando riba esaki pasobra Gobierno di Aruba ta mas preocupa cu ne, pasobra Gobierno ta preocupa pa henter Aruba y Gobierno ta buscando un solucion.

RECORTE DI 5%:

Riba e di dos punto di señora Albertus di SIMAR, e ta expresa duda si nan lo haye e 5% bek of no. Contestando señora Albertus di SIMAR, Prome Minister a informe, mescos cu Secretario di Estado Alexandra van Huffelen y Prome Minister mes tambe den bastante ocacion, y extensamente, den placa chikito, dia 20 di juni ultimo, Aruba ta e unico pais cu a yega na un acuerdo cu Hulanda bou di cua condicion Aruba por cuminsa stop e recortenan. Manera cu ta conoci, e acuerdo aki a wordo aproba door di Conseho di Minister di Reino dia 24 di juni ultimo.

Gobierno di Aruba aworaki ta trahando cu tur forsa pa cumpli cu e condicionnan pa asina cumpli cu e plan y e intension ta pa otro luna, juli, paga e 5% na tur trahado cu di Gobierno y esnan cu ta traha pa fundacionnan cu ta wordo subsidia pa Gobierno.

PRIJS AUMENTO DI GASOLINE:

Riba e preocupacion aki cu señora Albertus di SIMAR a expresa den su carta, Prome Minister a splic’e, manera ya ta conoci, e aumento di prijs di gasolin, ta e resultado di e aumento internacional di e prijsnan di gasolin y di crudo. Esaki manera nos sa, ta e consecuencia di e conflicto di Ukraina. Esaki ta un problema mundial y Aruba no ta un exepcion den esaki. Y mientras cu e prijsnan ta keda subi riba mercado internacional, lamentablemente, e prijsnan na Aruba tambe lo sigui subi. “Gobierno ta siguiendo e desaroyo aki hopi di cerca pasobra nos ta hopi preocupa pa esaki tambe”, Prome Minister a expresa.

AREGLO DI VUT:

Manera cu recientemente Gobierno di Aruba a anuncia, a habri posibilidad pa un areglo di vut pa ambtenaarnan. Señora Albertus ta di opinion cu e areglo di vut no ta amplio pa tur docente aplica pa vut, of kita di trabou.

Prome Minister, contestando señora Albertus, a expresa cu e ta comprende e mal contento aki pero ta supone cu como sindicato di maestronan, señora Albertus ta consciente tambe cu tin un escases di docente na Aruba. “Ta algo sumamente iresponsabel pa haci bou di e circumstancianan actual si Gobierno duna vut na tur hende cu kier”, Prome Minister a expresa.

Tin cierto circumstancia cu por duna vut na docentenan. Pa esaki, Prome Minister a conseha señora Albertus pa bay den deliberacion cu Directie Onderwijs y talves hunto nan por bin cu un maneho bou di cua condicionnan lo por duna vut na docentenan.

E carta di Prome Minister dirigi na Presidente di Sindicato SIMAR, señora Josephine Albertus, a wordo manda diahuebs mes mesora despues cu a ricibi e carta di e sindicato, sperando cu señora Albertus y Sindicato SIMAR comprende tur loke cu a wordo splica riba nan mal contentonan y si tin mester, lo sigui atende cu preocupacionnan cu tin.