Parlamentario Marco Berlis: E DERECHONAN DI LIVE-IN MAIDS (PART-2)

Awe mi kier a continua riba e derechonan di Live-in maids. Mi a cuminsa riba e topico aki algun siman pasa, y despues di a haci un bon investigacion, lesa algun leynan corespondiente, consulta cu algun colega y reuni cu CMMA, mi a logra adkiri mas conocimiento pa asina mi por informa pueblo mas riba e topico aki. CMMA ta para pa Coordinatiecentrum Mensenhandel & Mensensmokkel Aruba. E ta un fundacion cu ta haciendo un tremendo trabao y nan ta hopi bon conecta tambe cu autoridadnan.

Un di mi preocupacionnan ta, cu poco ta wordo haci, ora cu hendenan abusa di live-in maids na un cas. Tambe e ta dificil pa autoridadnan actua pasobra e live-in maids ta wordo menasa y oprimi hopi biaha. Mi por a compronde for di e informacion cu mi a ricibi cu ley ta baha pisa riba diferente tipo di abuso cu hende por comete contra e personanan aki. Ora cu ta comete “mensenhandel,” esaki ta ora por ehempel, un persona ta wordo maltrata, menasa, engaña, e doño di cas ta kita su paspoort, y cosnan similar, esakinan ta castigabel pa ley. Por ehempel: ora un hende kita e paspoort di un live-in maid, y ta kita su libertad, e no por sali for di e cas, e ta wordo menasa, priva di tur su derechonan, su dianan liber, vakantie y tempo liber cu e tin derecho riba dje, esaki nos ta yama secuestro. Y secuestro ta wordo castiga severamente pa ley aki na Aruba. Si un denuncia ta wordo haci contra e doño di cas cu ta comete e tipo di actonan castigabel aki, sigur e lo tin problema hopi grandi cu ley. Castigo pa secuestro por cuminsa cu 4 aña cera den prison!

Mensensmokkel ta un acto ainda mas castigabel. Algun ehempel di esaki ta ora e persona cu ta wordo tuma pa traha den cas ta wordo forsa pa haci otro tipo di trabaonan tambe. Kizas e ta wordo menasa cu si e no coopera, e ta wordo deporta. Esaki ta un ehempel unda ta saca probecho di e vulnerabilidad di e persona, cu ta wordo menasa continuamente. Un otro ehempel ta obliga un hende traha pero no ta pag’e, esaki ta sclabitud! Tur e actonan aki sigur ta condenabel y ta sucede den nos comunidad. Ademas, ley ta condena e actonan aki di un forma basta pisa. Den articulo 2:154, 155, 239 di WVSR, e ta elabora riba e tema di mensensmokkel y e consecuencianan pa esnan cu ta practica esaki. Otro forma di mensensmokkel ta ora ta forsa live-in maids pa prostitui nan mes. E casonan aki ta existi y sigur ta sumamente condenabel.

Mi ta trece tur e informacionnan aki dilanti pasobra tin tanto casonan cu ta bin dilanti di abuso di esnan extranhero, cu hopi biaha ta sinti nan mes devasta, debil pa e necesidad cu nan famia tin, y hopi biaha ta soporta loke hamas nan mag di experencia aki na Aruba. Den un Aruba moderno, educa y humano, e tipo di trato aki simplemente ta inacceptabel y hamas por wordo tolera.

Mientras tanto mi lo continua pa investiga y trata na yuda conscientisa y educa pueblo riba e topico aki. Alaves mi lo sigui lucha pa mehora e situacionnan di esnan vulnerabel y cu hopi biaha no por lucha pa nan mes. Maldad no ta djis ora hende horta, comete fraude, of ora cu ta asesina un persona. E ta tambe ora cu un persona ta wordo abusa. E ta tambe ora cu hende ta comete actonan contra derecho di un extranhero vulnerabel. Esakinan mayoria di biaha ta pasa scondi. Pero sigur mi lo continua pa vocifera mi preocupacion y advertencia contra di esnan cu ta abusa. Tin cambionan na caminda. Husticia semper ta prevalence.

Si pueblo ta wak, scucha of conoce un caso asina aki, bo por contact CMMA. E fundacion aki ta bou guia di Sra Jeanette Richardson y Angela Persad. CMMA tin 3 prioridad: pa duna informacion, educacion y asistencia. Nan tin un hotline 24/7 pa comparti informacion of duna asistencia. CMMA ta asisti y ta provee shelter y otro servicionan na victimanan di
mensensmokkel y mensenhandel. Nan hotline ta 592-3231, oficina 597-5223 y nan email ta: info@cmmaruba.com