PARLAMENTO A CUMINSA TRATA LEY DI FASE

ORANJESTAD, Aruba

Dialuna 4 di juli a cuminsa den Parlamento e tratamento di e Ley di FASE. Esaki ta e ley cu ta duna e base legal na e pagonan di FASE cu a wordo haci durante di e pandemia. Hopi famia na Aruba a wordo yuda cu FASE. E ley aki a tarda pa cana su caminda pa e motibo aki ta apenas dialuna Parlamento ta trat’e. “Mi lo a desea cu esaki no a tarda asina tanto pero mi ta hopi contento cu Gobierno di Aruba a introduci FASE y por a yuda miles di persona aki na Aruba, Prome Mininster Evelyn Wever-Croes a expresa.

Prome Minister a duna di conoce cu no por a warda pa e ley prome pa haci e pagonan pa motibo di e urgencia cu tawata tin. Nos ta corda cu diabierna 13 di maart 2020, Aruba a conoce su prome 2 casonan di Covid 19. Ya e siguiente dialuna, scolnan a wordo cera, sigui pa ciere di frontera, a introduci shelter in place y toque de queda.

E ansha a cuminsa lanta na Aruba. Miles di persona ya caba a cuminsa perde trabou pa motibo cu negoshinan a cera nan porta cu a haci cu no por a sigui paga salario. Na e momento ey no tawata tin loonsubsidie. Promesa di Hulanda tawata pa yuda cu loonsubsidie, miestras Aruba ta cumpli cu un cantidad di condicionnan. Aruba a haya e prome placanan pa loonsubsidie na mei.

“Danki na accionnan rapido di Minister Glenbert Croes, hunto cu Minister Xiomara Maduro, Gobierno a logra bin cu e proyecto di FASE cu a yuda miles di mama y tata di famia cu a perde nan trabou. Taxistanan y esnan cu tawata tin negoshi chikito tambe a wordo yuda cu FASE. E FASE tawata un suma di 950 florin pa luna cu sigur a wordo bon uza pa esnan cu a bin na remarc’e pa esaki”, Prome Minister a duna di conoce.

E Ley di FASE ta wordo trata awo na Parlamento. E ley sigur lo mester a pasa mas lihe. Pero pa Gabinete Wever-Croes II, den e pandemia e tempo ey, prioridad tawata pa salba bida di hende. Salba trabou di ciudadanonan. Percura pa esnan cu a perde trabou haya ayudo financiero y pakete di cuminda pa nan por sobrevivi. Despues cu e parti mas critico a pasa, Gobierno a concentra riba e ley cu ta den Parlamento aworaki. Minister Glenbert Croes y Minister Rocco Tjon ta den Parlamento pa defende e ley aki.