Mayoria gasto di experto ta pa paga proyectonan di automatisacion na Departamento di Impuesto
ORANJESTAD, Aruba
Subida na aña 2018 tabata pa paga gasto di abogado pa caso final di garantia di Eagle Beach Hotel NV
Un analisis di e gastonan di Gobierno di aña 2015 pa 2021 ta mustra cu e gasto di experto, ‘deskundigen advies’ a subi den e periodo menciona pa cubri gasto di automatisacion na Departamento di Impuesto DIMP y pa conseho huridico pa e caso di Eagle Beach Hotel NV cu despues di hopi aña ta yega su final. Na aña 2019 bay dilanti e gastonan ta bolbe baha.
Pa aña un promedio di 15 miyon florin ta bay na gasto di experto. Di e suma aki un 64%, esta 9 miyon florin, ta bay normalmente pa paga pa e proyectonan di IT na DIMP y pa conseho huridico. Sinembargo den aña 2016 y 2018 por mira cu tin un subida di gasto y e analisis ta mustra cu e subida ta debi na e proyecto di automatisacion DIMPLE na DIMP na aña 2016 y gastonan di abogado pa e caso di garantia na Eagle Beach Hotel NV cu a wordo declara failliet na aña 1993 y cu abogado mester a caba di atende cu e caso aki na aña 2018. Despues por mira cu den aña 2019 pa 2021 e gastonan di experto ta bolbe baha y ta keda bou di e promedio.
FIN
