Minister Dangui Oduber
PROYECTO BOARDWALK MALMOK LO CONTINUA CU SU FASE 3 DEN 2022

ORANJESTAD – Aña 2022 ta premira di ta un aña cu varios proyecto pa Ministerio di Turismo y Salud Publico. Durante Gabinete Wever-Croes 1 Minister di Turismo Sr. Dangui Oduber a realisa diferente proyecto cu a yuda eleva e producto Aruba. E periodo di gobernacion 2021-2025 no ta bay ta diferente, varios di e proyectonan lo ta cuminsando den aña 2022, un di esakinan ta e proyecto di Boardwalk Malmok fase 3.
E proyecto di Boardwalk Malmok no ta uno desconoci, e proyecto aki a conoce su fase 1 y tambe su fase 2. Esaki nan a keda realisa den e ultimo gobernacion. E boardwalk aki ta wordo masha uza pa nos localnan y tambe nos bishitantenan. E la trece seguridad na tur esnan cu ta haci uzo di dje y e la trece un embeyesimento sin igual den e area aki. Segun e planificacion cu tin haci entre Ministerio, ATA, TPEF, DOW y DIP, na comienso di e aña aki lo bay cuminsa cu e fase 3 di e proyecto di Boardwalk Malmok.
Den e fase 3 lo bay enfoca riba e embeyecimento di e proyecto den su totalidad. Lo bay planta mas palma y flornan colorido. Tambe lo bay construi mas area di parkeo cu mester pas cu e parti naturalesa. Ta importante pa menciona cu tur proyecto cu lo bay wordo realisa ta wordo planifica a base di e “Sustainable Development Goals” cu ta e norma mundial di Nacion Unie.
Minister Dangui Oduber tin ful un plan integral pa Aruba su turismo. Banda di e proyecto aki tin mucho mas proyecto pa aña 2022. Turismo ta keda e driver principal di nos economia.