Minister Dangui Oduber ta gradici tur maestronan di scol y ta felicita tur alumnonan pa cu e ceramento di aña escolar 2021-2022

ORANJESTAD – Diabierna e aña escolar 2021-2022 a yega na su fin y vakantie grandi a cuminsa oficialmente. Pa es motibo Minister di Turismo y Salud Publico sr. Dangui Oduber ta gradici tur nos maestronan pa a guia, inspira y educa nos studiantenan durante e aña escolar. Un pabien na tur e muchanan y hobennan cu a bay over y tambe na esnan cu a gradua, suerte den e siguiente aña escolar of cualkier reto cu boso por tin.

Educacion ta e yabi pa futuro, e ta un privilegio, un derecho di tur mucha, pa siña y expande nan mes. Como Minister encarga cu Turismo y Salud Publico mi ta gradici y felicita tur nos hobennan cu ta studiando sea na EPB, EPI y Universidad di Aruba pa bay labora den nos sector di hospitalidad y/of den cuido medico. Boso por logra tur cos cu boso pone como meta boso dilanti!

Danki na e maestronan pa nan esfuersonan continuo na e studiantienan, esaki ta locual ta crea e pilarnan den nos sociedad pa e dia di mañan. E ta tuma curashi pa haci e trabou aki, asina minister Oduber a trece dilanti.