Un KB sigur lo ta na ordo!

Despues di a tuma nota di MinFIC su conferencia di prensa di 11 juli 2022 ta importante pa aclara algun punto. Na prome luga ta importante bisa cu un deficit di 236 miyon florin NO ta manehabel manera Xiomara ta insinua. Tanten cu presupuesto tin un deficit, gobierno ta perdiendo placa paso e ta gasta mas cu e ta haya den entrada. Na 2022 gobierno ta den cora 19,6 miyon florin tur luna y nos tur por deduci cu esey no por sigui sin consecuencia. Berdad tin momentonan cu crea debe no ta malo y por yuda crecimento di un pais pero unicamente dentro di un margen responsabel y esey no a sosode. No tin nada mas destructivo cu manda un pais failliet y esey ta parce e rumbo cu e gobierno aki a scoge, mescos cu esunnan cu a precede nan.

Despues di 2022, Aruba no tin mas placa fia fe Hulanda pa refinancia 4 biyon florin di debe cu ta bay madura entre awor y 2026. Otro aña caba Aruba lo mester subi mercado internacional y purba fia placa pa paga nos debe existente door di crea debe nobo. Nos posicion financiero a deteriora di un manera significativo desde pandemia y awor nos debe ta mas grandi cu nos economia desde cu ela pasa 100% di GDP. Dus un pais perdiendo placa, cu debe mas grandi cu su economia, lo subi mercado pa fia placa pa paga debe existente creando mas debe nobo. Con boso ta kere esey lo bay?

Mas preocupante ta cu gobierno no por ni mustra cu den futuro cercano nan lo cuminsa gana placa pa por cuminsa paga debe bek. Gabinete Wever-Croes no tin idea di produci un surplus durante su periodo di gobernacion, kiko posibel creditornan lo pensa di esey? Si nos logra haya placa fia mes lo ta na interes basta mas halto practicamente sigurando nos kiebra. Dus ora MinFIC ta vocifera ariba esnan cu kier destrui nos pais e no mester wak mucho mas leu cu su mes den spiel. No ta ningun sorpresa cu CAft ta bati alarma y mirando gobierno su contestanan, un KB sigur lo ta na ordo.

Ora bo baha gastonan di personal pa menos di loke bo a hisa gastonan di producto y servicio bo a sigui contribui na kiebra y no solucion. MinFIC kier gaba cu Aruba su gastonan di producto y servicio ta algun di esunnan mas abao den region segun IMF. Ta manipulacion declara esey sin mustra cu nos gastonan di personal ta algun di esunnan mas halto si no esun di mas halto den nos region. Xiomara a gaba cu un surplus chikito na 2019 pero esey a wordo logra door di hisa BBO y introduci BAVP no door di un bahada structural den gastonan di gobierno manera CAft ta pidi.

Mescos cu Parlamento 2010-2017 a aproba deficitnan iresponsabel, Parlamento 2021-??? a haci mescos aprobando presupuesto 2022. Un surplus di 1% ta mas o menos 60 miyon cual Xiomara ta añadi na deficit di e aña aki pa produci e 286 miyon cu e ta describi como e buraco entre e cu CAft. Realidad ta cu economia lo sigui recupera surpasando 100% di 2019 creando entrada adicional, BTW lo produci un 100-150 miyon mas di entrada, introduccion di BTW tambe kier men cu sector informal calcula na casi 20% di nos economia tambe lo contribui dus e buraco di 286 miyon florin ta hopi menos. Sinembargo bahada structural den gastonan di gobierno cu te awor ta ausente mester materialisa specialmente si kier trece alivio pa pueblo.

Den su disertacion MinFIC a insinua cu partidonan bieu cu un presencia grandi den Parlamento ainda ta miho prepara pa implementa cambio impopular, unico cos ta cu no tin ningun evidencia di esey. Ta pakiko te awor bao presion di Hulanda ora no ta keda nan nada otro ta cuminsa papia di flexibilidad laboral, reforma fiscal, reduci gastonan di AZV, restructura Serlimar, reduci gastonan di personal etc.? Ora Xiomara ta referi na 2001 pa 2017 como 16 aña di “stabilidad politico” di un solo partido ta goberna, e ta lubida di menciona cu ta netamente durante e periodo ey nos pais a kibra danki na politiconan di e dos partido bieunan. Kisas ta importante pa MinFIC studia trayecto di PvdA (zusterpartij orginal di MEP) y CDA (zusterpartij di AVP) durante ultimo 20 añanan pa descifra nos futuro panorama politico. Proximo eleccion nos lo mira e plafond di dos asiento pa partidonan nobo surpasa y e futuro no ta di dos partido bieu/grandi pero di 4-5 partido competitivo.