Minister Maduro ta aclarea:

Na ningun momento a referi na partido Raiz den splicacion na prensa

Atrobe oponente politico ta busca forma pa kibra stabilidad politico di Aruba

Oponente nan politico ta buscando tur manera pa asina destabilisa e gobernacion di Pais Aruba. E siman aki nan a haci uzo di un splicacion cu Minister Maduro a duna contestando un pregunta di prensa riba gobernacion di Aruba na man di partido nan grandi manera MEP y AVP, pa saca esaki fo’i contexto y traha meme pa haci pasa cu e mandatario ta referi den su contesta na partido Raiz.

Minister Maduro ta aclarea cu na ningun momento ela referi na partido Raiz of a menciona nomber di Raiz como partido di coalicion. E mandatario ta lamenta cu oponente politico atrobe ta busca forma pa crea division y rabia den comunidad pa asina purba destabilisa un gobernacion di coalicion di Aruba. Sigur awor cu Aruba tin asina tanto reto, e atencion di tur hende mester ta dirigi na con ta hiba Aruba dilanti, en bes di keda busca manera pa haci daño na nos Pais.