XIOMARA MADURO NINGUN MOMENTO A REFERI NA PARTIDO RAIZ

ORANJESTAD, Aruba

Durante conferencia di prensa dialuna ultimo, Minister Xiomara Maduro riba pregunta di prensa, a duna un ehempel di Hulanda di partidonan grandi y partidonan chikito.

Oponentenan y nan spindokternan mesora a spin esaki manera cu Minister Maduro a ataca su partido di coalicion Raiz. Minister Maduro a desmenti esaki y a declara cu na ningun momento el a referi na Partido RAIZ y e no tabata kiermen Partido RAIZ tampoco. Minister Maduro a bisa explictamente cu ta un ehempel di Hulanda.

“Es mas, mi por bisa como lider di e partido partner di coalicion, cu nos ta aprecia e relacion cu nos tin cu partido RAIZ. Partido RAIZ ta un partido serio, cu ta demostra cu kier haci tur locual cu ta posibel pa saca Aruba di e crisis cu e pandemia di Covid y e guera na Ukraina a ocasiona.

Si nos compara, cu tempo nos tabata den un gobierno cu RED y POR, ta full un otro scenario. E egoismo di e dos partidonan ey na final a caba cu gobernacion. E gobernacion di partidonan MEP y RAIZ ta bay den harmonia y a base di respet.

Y si nos compara partido RAIZ cu e partidonan MAS y Accion 21, tambe nos  tin cu bisa, cu partido RAIZ ta demostra e seriedad y compromiso cu Aruba, mientras cu MAS y Accion21 ta critica so sin bin cu solucion. 

Aruba ta pasando den momentonan hopi dificil y comunidad di Aruba por ta sigur cu un Gobierno di MEP y RAIZ lo saca Aruba di e crisis aki tambe”, Lider di MEP, Evelyn Wever-Croes a expresa.