Parlamentario drs. Shailiny Tromp-Lee: Dentro di poco Lotto ta bira di nos deportistanan bek!

ORANJESTAD, Aruba

Awe mainta Gobierno di Aruba a haci un tremendo anuncio pa loke ta trata Fundacion Lotto pa Deporte (FLPD). Despues di 11 aña a logra habri negosacion bek pa loke ta trata e contracto di FLPD cu Canadian Bank Notes (CBN). Un contracto cu desde 2011 a bin ta cambia drasticamente y sigur no tabata nada beneficioso pa Pais Aruba.

Den 10 aña di tempo, for di 2011-2020, 104 miyon florin a bay pa CBN y 34 miyon florin a keda pa nos. Un situacion indesea y cu sigur no ta cuadra cu e motibo y meta pakico den pasado a bin cu un Lotto pa Deporte pa Aruba. Banda di e realidad aki, nos tur por a ripara con atras nos complehonan deportivo a bay y alabes for di cifranan nos por a constata cu no obstante cu e entrada di benta durante añanan a aumenta e suma cu ta keda inverti berdaderamente den deporte si no a aumenta. Un situacion cu Minister Endy Croes, Board di FLPD y nan conseheronan a bin ta traha duro riba dje pa algun tempo caba. E resultado di e negosacion cu a tuma lugar cu CBN a keda anuncia awe. A logra bolter e contracto na beneficio di Aruba, di e mundo deportivo y principalmente nos deportistanan.

Sigur un pabien ta na su lugar pa Gobierno di Aruba, Minister Endy Croes, Board FLPD y principalmente e team negociado cu a haci un tremendo trabou. Na CBN mi ta manda palabra di gradicimento pa tabata habri y dispuesto pa renegocia. Durante 2001-2009, Gabinete Oduber III y IV, mi a experiencia nan ‘good corporate citiszenship’ y nan responsabilidad social sigur a keda demostra den e periodo aki.

Mi ta keda enfatisa e necesidad pa sigui traha na mehoracion di e relacion entre Gobierno, CBN y FLPD na beneficio di Lotto riba su mes. Pasobra si Lotto bay bon, si Lotto genera mas entrada, si Lotto su situacion financiero ta bon, si e repartición ta husto, ta beneficio so esaki por trece cu ne pa nos país y pa nos deportistanan.Trahndo hunto sigur nos ta logra mas.

Mi ta termina subrayando cu enberdad e anuncio di Gobierno awe tabata uno importante, impactante y histórico. Dentro di poco Lotto ta bira di nos bek. Sigur e anuncio aki ta yena ami cu hopi speransa y mi ta convenci cu den 2023 nos ta bay mira cu mas inversion den deporte ta bay keda realisa na beneficio di nos deportistanan y deporte en general. Pabien Aruba!