NA MEMORIA DI SRA. DIANA LEBACS, ESCRITOR, AUTOR, DOCENTE, EDUCADO, CONTADO DI CUENTA, CANTANTE Y POETA

ORANJESTAD, Aruba

Diana Melinda Lebacs ta un baluarte di isla ruman Curaçao cu a bay laga nos e luna aki. E tabata kere semper den cultura mudial, cu ta acapara mas cu e islanan ABC. Si ta pa skirbi pa un solo isla por ta un seguridad, pero esey no ta tur. E tabata un persona cu ta kere, cu cultura bo tin cu carg’e, hib’e afo y comparti esaki. Esey a sosode despues di su debut cu e buki “Sherry, het begin van een begin” na 1971.

Diana a skirbi buki tanto na Papiamentu y Hulandes. El a fayece despues di un periodo cortico di malesa na edad di 74 aña. Su tata, un artista artesano, tabata traha popchi di wajang y tabata musico. Su mama tabata un señora di Surinam. Tur cos den cas tabata ser produci for di nan propio man. E balornan aki artisticamente Diana a ricibi for di cas mes. E sentimento pa balor propio, cu di loke bo mes por haci y aporta.

Na 1976 el a ricibi e Silver Stylus award, un di e honornan mas halto di Hulanda pa literatura pa e buki ‘Nacho van Bonaire’.

Na 1976 Diana ta casa cu Pacheco Domacasse y nan tin dos yiu.

E programa di television na Hulanda ‘Hartelijke groeten’ na 1983 tabata un fuente grandi di inspiracion pa skirbi.

Diana a hinca hopi energia pa e emancipacion di Papiamentu, e di dos lama di e sirena.

E tabata cabesante di e prome scol basico den Papiamentu. Ora el a ripara cu no tabatin suficiente buki pa lesa el a dicidi di cuminsa produci bukinan den Papiamentu pa alumnonan di prome te cu seis klas. Diana tabata domina ambos idioma bon, esta e Hulandes y Papiamentu. Pa e buki di regalo pa e siman di buki di Biblioteca Nacional Curaçao el a haci e redaccion riba origen di textonan na Papiamentu di e diferente autornan di idioma Hulandes y traduci nan di Hulandes pa Papiamentu.

Pero e no a dedica solamente na e lesamento di muchanan jong, sino tambe pa e bacheloropleiding di e Facultad General di Universidad di Curaçao a duna nan cursonan di skirbi creativo. Den esaki mayoria di e studiantenan tabata scoge e opcion di Papiamentu. Pa varios aña el a sinta como hurado di Festival di Tumba. Diana tabata husga e nivel di letra di e cancion.

Tambe riba e area di Teatro Diana a desplega, sigur pa e amantenan di Papiamentu. El a actua den hopi produccion, no solamente den Papiamentu, manera ‘Ilushon di anochi’, traduccion di Shakespeares…”A Midsummer night’s dream”, ‘Tula’ skirbi pa Pacheco Domacasse y dirigi pa Tone Brulin, ‘Seis den un’ door di John Leerdam, ‘Un kayent’un friu’, (Opvlieger of Hot Flashes, den tres idioma) bou direccion di Henk Tjon. ‘Monologo di vagina’ dirigi pa Annemarie Oster, pero tambe den idioma Hulandes, manera  den ‘Tussen Ons’ dirigi pa Peter Tuinman. Diana tambe a dirigi cu mesun un cantidad di alumnonan di e scol di biale di Fina e presentacion di baile ‘Abeltje’.

Algun di su trabounan como autor y escritor tabata: Manera a menciona prome caba ‘Sherry, het begin van een begin na 1971; ‘Nacho van Bonaire’ (1975) (Zilveren Griffel); ‘Nacho Matroos’ 1977; ‘Nacho niemand’ 1979; ‘Nacho kapitein’ 1982; ‘Suikerriet Rosy’ 1983; ‘De Spokenband’ 1985; ‘Het Witte Licht’ 1986; ‘Lichten boven Klein Bonaire’ 1990; ‘Robin en de Reuze-Robot’ 1992; ‘De Langste Maand’ 1994 un roman cu ta bay riba peligronan rond di carnaval; ‘Caimins geheim’ 2002, esaki ta un buki pa hubentud den dos idioma; ‘Fula fula’ 2005; ‘Waar is Olivier? Unda Olivier ta? Ta un buki digital den dos idioma un buki di prenchi; ‘Ubuntu’ 2010; ‘Belumbe/De waterlijn’ 2014 ta un di varios poesia (dichtbundel) den dos idioma.

Na 2016 durante siman di Kultura na Korsou, director di DCA drs. Siegfried Dumfries tabatin un encuentro ameno cu varios escritora y autor di buki Antiano. Nan tabata Rina Penso, Greta Trapenberg, Mila Palm, Laura Quast, Jenny Fraai y Diana Lebacs.

‘Duizend leugens bruidstaart’ 2017 ta su di dos roman pa adulto. ‘Grandesa di Amistat’ na 2018.

Diana a duna varios tayernan na Aruba e temponaya cu Fundacion Arte Pro Arte (FARPA) y sra. Amy Lasten.

Durante actividadnan di Dia di Lenga Materno tambe e tabata na Aruba. Tabatin varios encuentro cune durante Arte di Palabra ABC y Arte di Palabra.

Premionan cu Diana Lebacs a ricibi ta:

-1976 Zilveren Griffel pa e buki ‘Nacho van Bonaire’.

-2003 Premio Cultural di Stichting Nana (Prins Bernhard Cultuurfonds NA y Aruba).

-2007 Ridder in de Orde van Oranje Nassau.

-2012 Tapushi Literario di Arte di Palabra.

-2020 Chapi di Plata di Fundacion Pierre Lauffer.

Nos por bisa Hulanda, Aruba, Bonaire y Curaçao tabata nifica hopi den bida di Diana.

Diana ta fayece na edad di 74 aña, depues di un temporada cortico di malesa riba 11 di juli 2022, riba e mesun dia cu su ultimo Roman ‘Dame van de avond en het berouw van Benaro’ ta ser imprimi for di imprenta.

Sigur un gran baluarte den persona di Diana Melinda Lebacs, e lo bay haci falta riba e tereno y tarima cultural.

Director, staf y personal di Departamento di Cultura ta expresa palabra di condolencia na su famia, amigo y conocinan, esnan di mundo literario y comunidad di nos isla ruman Curaçao.  

————————————————————————————————————————–

Compila pa Stan Dabian

Informacion di Antilliaanse Dagblad y NosTv Bonaire