Hospi Bondi Camp celebrando 30 aña di existencia

ORANJESTAD, Aruba

Hopi mucha a lanta dialuna entusiasma pa por fin bay Hospi Bondi Camp. Tur mucha tabata ‘looking forward’ pa e dia aki yega y pa hunto cu otro celebra e di 30 aña di existencia di e dushi camp aki.

Durante e apertura oficial Rachelle Roos, hoofdleidster y coordinador di Hospi Bondi Camp a hiba algun palabra gradiciendo e comision fundado di e camp y e sindicato ABV cu ta sostene e camp. “Sin nan esfuerso y dedicacion pa sigui, cu tur su reto, sigur no por a logra yega unda nos ta awo. Un camp cu muchanan ta anhela pa bay, bon organisa y lidernan trahando cu amor mientras ta sigura cu e muchanan ta safe y contento.”

Miembronan di Hunta di Directiva Jacco Vroegop y Gregory Croeze durante apertura ta conta con orguyoso nan ta di e team y e logro enorme aki. A gradici e invitadonan special, miembronan di e comision original di Hospi Bondi, y a uza e oportunidad aki pa duna nan un reconocimento bunita. Un obsekio pa gradici nan pe inspiracion di 30 aña di Hospi Bondi.

Noralfa Eckmeyer ta conta cu e tabata un participante di Hospi Bondi Camp y despues tambe a bira hoofdleidster di e camp. “Mi ta hopi satisfecho di por mira e muchanan cu na final tambe ta lider di mucha na Hospi Bondi”.

Joan Danies, miembro di ex-comision di Hospi Bondi Camp, a splica cu despues di 29 aña y awo celebrando 30 aña, ta hopi bunita wak e exito awe di un inicio di un fundeshi cu a cuminsa cu ne.

Aldrich Dijkhoff tabata participante y lider di Hospi Bondi Camp y pe Hospi Bondi banda di tin bunita memorianan ta “friendship for life”, pasobra desde el a cuminsa te cu awo, e tin e mesun amigonan cu ta sostene otro den bon y malo.

Nora Eckmeyer tabata lider di Hospi Bondi Camp pa hopi tempo y hasta despues cu el a retira ela keda activo y tur aña keto bay t’ey pa yuda. Pa Nora e camp ta significa hopi. E tin un satisfaccion grandi di mira e muchanan ta pasa bon den Hospi Bondi Camp y ta splica cu e ta gusta mira nan tur aña bek atrobe.

Rachelle Roos a sigura cu masha poco ta campnan cu ta dura asina largo. P’e ta un logro hopi grandi y ta algo emocional cu nan por a yega asina leu. No tabata facil ultimo añanan pa haya un luga adecua pa diferente motibo pero a logra toch e aña aki pa bin cu e camp na e luga tradicional esta riba plenchi Hospi Bondi situa parti patras na Hospital. Por a mira hopi mucha contento, cla pa hunga, trip y haci hopi aventura.

Sra. Roos ta gradici Hunta di Directiva p’e confiansa, sra. Sheila Kelly di recurso humano di Hospital, Gina Maduro di sindicato ABV y tur colega cu ta yuda pa nan aporte. Claro un danki enorme tambe na tur mayor y lider pe confiansa den dje pa sigui cu Hospi Bondi Camp.

FIN