Tin su peliger pa salud publico

ORANJESTAD, Aruba

Tur aña di nobo for di luna di juli pa december nos conose como lunanan di yobida. Pa algun esaki ta un bendicion, pa salud publico esaki por ta un peliger.

Yobida ta nifica posibilidad pa sangura brui y ocaciona brote di malesanan transmiti pa sangura manera Dengui, Chikungunya y Zika. Pa evita cu Aruba por enfrenta un brote di e malesanan aki manera den pasado, ta importante pa comunidad completo pone atencion y elimina awa cu ta keda para despues di cada yobida. Sangura mester awa pa por pone su webonan. Si cada persona percura pa rond di su cas no tin awa para, hunto nos por mantene e cantidad di sanguranan rond di nos isla abou y asina reduci e cantidad di malesanan transmiti pa sangura manera Dengui, Chikungunya y Zika. Si bo persona ta sinti hopi molester di sangura, GKMB ta conseha pa haci un bon inspeccion rond di cas y elimina tur awa para. Si despues di haci inspeccion ainda e molester ta continua, por yama GKMB pa informa y nos servicio lo inspecciona e vesindario.

Pa mas informacion tuma contacto cu GKMB na 5855533, sigui nos riba facebook Directie Volksgezondheid DVG Aruba of mail nos na servicio@dvg.aw.