MINISTER ENDY CROES TA FELICITA PARLAMENTO HUBENIL CU NAN LOGO NOBO.

ORANJESTAD, Aruba

Minister Endy Croes a presencia e bunita ceremonia di desvelo di e logo nobo di Parlamento Hubenil Aruba en conexion cu nan 20 aniversario na aña 2023. Parlamento Hubenil ta activo pa 19 aña den comunidad di Aruba. Parlamento Hubenil ta un plataforma cu ta representa e hubentud di Aruba y pa medio di e plataforma aki por intercambia nan experencianan y vision cu Gobierno y Parlamento di Aruba. Di e manera aki tin un participacion activo di banda di hubentud di Aruba y asina por stipula e maneho basa riba e deseo y realidad di nos hobennan. Parlamento Hubenil ta sali na defensa di e muchanan y nos hobennan. Actualmente Parlamento Hubenil ta den proceso di transformacion y restructuracion di e organisacion pa crea desaroyo y oportunidadnan nobo. E ‘rebranding’ di e organisacion ta parti di e transformacion cual ta inclui un logo nobo, cu ta conecta cu e proposito di Parlamento Hubenil y hobennan di Aruba.  

Minister Endy Croes tabatin e honor di dirigi algun palabra na e ocasion special aki unda a expresa: cu nos a compromete cu tur luna lo reuni cu Parlamento Hubenil pa scucha nan y pa papia di temanan di interes y Gobierno di Aruba lo actua riba e temanan aki. Ya caba nos a reuni dos biaha cu Parlamento Hubenil riba varios topico di importancia bou di nos hobennan y den e lunanan nos dilanti e reunionnan lo continua. Di e manera aki nos ta duna nan sosten y e oportunidad pa nan por desaroya y forma un miho persona pa cu nan futuro como tambe sociedad.

Pa finalisa Minister Endy Croes ta gradici Parlamento Hubenil pe invitacion y recepcion. Alabes ta felicita e directiva nobo como tambe tur miembronan cu e lansamento di e bunita logo. Masha pabien y keda eherce e tremendo trabou!