ORANJESTAD, Aruba

Recientemente Minister Endy Croes tabatin un encuentro informativo cu un delegacion di docentenan di Aruba cu a biaha april ultimo pa Finlandia. Un total di diescuatro docente di tres diferente scol primario na Aruba a participa den e proyecto aki cu ta wordo financia pa Erasmus Plus. Presente na e atardi ameno tabata coordinador di e proyecto di Erasmus Plus sra. Monique Breinburg, coordinador di Pius X School, sra. Saskia Maclean, cabesante di St. Dominicus sra. Caroline Cardose, sra. Emilaine Giel di Erasmus Plus alabes coordinador St. Dominicus College y sra. Zulaika Flanegin di Erasmus Plus y coordinador di St. Franciscus. Meta di e reunion ta pa informa e mandatario di Enseñansa di e sistema di educacion na Finlandia como tambe pa comparti nan experencia. E docentenan a bishita diferente scol na Finlandia pa mira con Enseñansa ta wordo organisa. Finlandia ta un di e miho pais na mundo riba den e tereno di Enseñansa. Finlandia ta un di e paisnan na mundo cu mas ta inverti den Enseñansa. Na aña 2021 Finlandia a inverti 7% di nan GDP den Enseñansa. Cada diez aña Finlandia ta cambia e curiculo. Educacion basico ta completamente gratis.
 

Durante e reunion e docentenan duna un presentacion na e mandatario di Enseñansa di loke cu nan a experencia algun ehempel: e klasnan nan Finlandia ta consisti di un averahe di 24 studiante di tur nivel, cada studiante ta haya e stof cu ta coresponde (adaptief onderwijs).

Tin un ‘asistent’ den cada klas pa asisti e docente cu e alumnonan. E studiante ta traha segun su tempo y ta duna espacio pa cu esaki. Cada ‘les uur’ ta 60 minuut di cual 45 minuut e alumnonan ta haya les y despues esaki ta sigui pa 15 minuut pauze na unda cu e studiante por bay pafo pa hunga of hunga den e ‘breakout room’. Scol primario tin un duracion di 9 aña y e ta cuminsa na edad di 7 te cu 16 aña. Muchanan bou 7 aña no ta obliga pa bay scol, no tin ‘leerplicht’. Si e mayor ta desea  por manda nan yiu un scol preparatorio.  

Concluyendo Minister Endy Croes ta gradici e docentenan pe presentacion como tambe pa comparti nan experencia. E mandatario a sigui bisa cu e ta un bunita proyecto y kere cu Aruba mester profundisa mas den e materia aki. Enseñansa ta e yabi pa futuro.