Parlamentario Marco Berlis (MEP):Minister president a priminti y a cumpli: A paga bek e 5%!

Contra tur instigacion di oposicion awor ambtenaarnan ta ricibi 100% di nan salario atrobe!

Riba Diaranson July 20, 2022 Minister President di Aruba Minister sra.Evelyn Wever-Croes a anuncia cu gobierno di Aruba ta paga bek e 5% na ambtenaarnan. Minister President a priminti y e la cumpli! Ademas nos por wak con nos turismo actualmente ta kibrando recordnan y nos entradanan como pais ta subiendo. Tur cos ta indicando cu Aruba ta recuperando, aunke ainda nos ta den un crisis severo. Riba medionan social por a wak un tremendo recepcion di parti di pueblo pa cu e decision di nos Minister President Evelyn Wever-Croes y Minister Raad.

E tema aki tabata un debate pa hopi tempo y sigur oposicion den su totalidad a campaña contra, instiga y sembra descordia riba e tema di 5% aki. Nos no por lubida con gabinete Wever-Croes I & II a lucha cu tur su forsa durante y despues di pandemia, pa mitiga e consecuencianan grandi cu esaki a trece cu ne. E efectonan economico y social tabata y ta devastador pa pais Aruba. Asina mes gobierno a lora manga y a traha y no a sconde pa ningun problema, sino mas bien a haci tur loke tabata na alcanse pa por pone Aruba riba pia atrobe. Esaki Minister President a haci semper tratando na mantene tur hende informa y ta transparente semper. Pesey, awor cu nos economia ta recuperando y nos ingresonan ta subiendo, gobierno ta haciendo tur cos pa draai Aruba bek pa “normalidad.”

Gabinete Wever Croes II ta un gobierno cu a cuminsa goberna den un crisis economico cu Mike Eman a laga atras. Asina mes e gobierno a confronta e crisis cu determinacion, dunando cara, trahando pa pone solucion tras di solucion riba mesa, restaurando normalidad bek na Aruba cu vision, pasion, determinacion y disciplina.

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!