A.T.A. ta orguyoso di artista local Armando Goedgedrag
A comisiona Armando pa crea mural nobo

Publico por gosa di un mural nobo den centro di San Nicolas. A.T.A. a comisiona artista local, Armando Goedgedrag, pa crea e mural aki.

Recientemente Armando a presenta e mural na A.T.A. y a duna splicacion di e idea tras di e mural entre otro na San Nicolas Business Association tambe. Armando a subraya tambe su orguyo di por haci esaki pa San Nicolas cu ta asina special p’e y su famia. Su welo a traha na Lago y su famia ta biba na Weg Sero Preto.

E mural cu Armando a pinta ta parti di e campaña di conscientisacion di A.T.A. titula ‘My promise’ unda ta pidi bishitantenan pa compromete cu nan lo comporta nan mes debidamente pa cuida naturalesa y Aruba en general y cu nan lo cumpli cu leynan di Aruba.

Manera Armando a splica, e mural aki ta enfoca principalmente riba nos naturalesa, algo cu e ta gusta pinta. E Gutu (Queen Parrot Fish), e Blenchi berde (Blue-tailed Emerald) cu por wak basta na Aruba como tambe e Blenchi cora (Ruby Topaz Hummingbird) cu ta menos comun pero tambe por wak e na Aruba, tur ta especienan cu ta pertenece na Aruba. E colornan geel y oraño ta simbolisa e colornan di salida di solo, algo cu ta pas bon cu San Nicolas como ‘sunrise city’. E simbolonan riba casnan tipico di Aruba a wordo inclui como elementonan cultural. Pa resalta tur cos a haci uzo tambe colornan radiante di beachnan y mangelnan.

E mural aki tin un elemento interactivo unda tanto bishitante como local por para na e skina na banda robes di e mural (si ta para cara pa e mural) y por pone man mane ta ranca e pagina pa asina por descubri e bellesa di nos naturalesa. Por mira Armando haci un demostracion di esaki riba potret tambe.

Pronto A.T.A. lo agrega un QR code pa por lesa mas di e storia di e mural, como tambe pa haya mas informacion di e programa di ‘My promise’ y di e forma aki encurasha mas persona pa haci e promesa na Aruba tambe.