Noticia Politica

Parlamentario Marco Berlis (MEP):
MAINTA INFORMATIVO NA WEB ARUBA NV PA PARLAMENTO (PART-1)

Diamars mainta Januar1 11, di 8:00am pa 12:00pm, Parlamento a wordo invita pa WEB Aruba NV pa un mainta di informacion. Mi tin di bisa cu e informacion brinda tabata uno riba un nivel hopi halto y cu hopi contenido, cual mi ta bay elabora riba dje aworaki. Pueblo tin e derecho di haya informacion cu nan ta pidi pe y ta pesey e tabata asina importante pa tur parlamentario por a atende e mainta di informacion aki. Lastimamente, oposicion no a presenta, pero si tabata tin e tempo y curashi pa bin te den parkinglot di WEB, djis pa yama e mainta informativo aki pa “buitendag”, tratando na ridiculisa e importancia di esaki, y insulta coleganan y e expertonan di WEB un biaha mas. Pesey, entre otro, mi lo comparti cu hopi alegria e informacion cu a wordo comparti na nos, atraves di diferente articulonan e siman aki, na pueblo. E ora ey pueblo mes lo por opina si enberdad esaki tabata djis un “buitendag.”

Advertisements

Tabata tin varios expertonan di WEB presente na e sesion informativo aki, y tur a participa den duna informacion y contestacion di preguntanan cu tur parlamentarionan a haci. For di 8’or di mainta te 10:30am nos a haya informacion tocante di e produccion, vision y expansion di awa y electricidad aki na Aruba, pero tambe riba e Proyecto di Eagle LNG.
Prome cu mi bay comparti e informacion general aki, mi kier elabora riba e contestanan cu mi a ricibi riba algun pregunta cu mi a haci na e expertonan, cual oposicion kier a hunga rol cune;

  1. Con hancho e tubonan di gas lo bay ta cu ta core for di San Nicolaas te cu Web? Contesta: Nan lo ta tubonan di 4-6inch di hancho. Nan ta tubonan special, cu tin 3 laag di material di proteccion. Un tubo di 4-6 inch ta masha smal mes. Mi ta kere cu hopi hende a imagina cu lo bin cu tubonan masha grandi y hopi hancho.
  2. Ki tipo di presion lo tin riba nan? Contesta: nan lo mester tin un presion di 150psi riba nan pa asina e gas por yega Web y e por wordo usa pa e motornan.
  3. Ki ora nos por papia di low of high pressure? 150psi ta wordo considera low pressure, mientras por ehempel e “stoom” cu Web ta produci ta high pressure na 900psi.
  4. Tin peliger cu e tubonan di gas? Contesta: Manera tur fuel, por ehempel diesel, gasoline etc mester tuma un maneho responsabel, cual ta acapara cu e medidanan y standardnan internacional di seguridad pa traha cu diesel of gasolin. Esey ta conta pa cualkier fuel. Gas natural ta mas safe cu propaan gas. Lo traha bao di e standardnan di mas halto di nivel internacional pa asegura e seguridad y stabilidad di e tubonan di gas y e proteccion di e ciudadanonan.
  5. A tuma un decision con lo pasa e tubonan? Contesta: Ainda no a dicidi si ta bay haci’e riba of bao tera. Pero lo anuncia esaki den futuro cercano.

LNG Gas ta un parti vital di Web su vision, keda pendiente paso mi lo sigui comparti hopi mas informacion di e tremendo “buitendag” di Parlamento.