A.T.A. y San Nicolas Business Association enfocando riba desaroyo turistico na San Nicolas
ORANJESTAD, Aruba
Recientemente Aruba Tourism Authority a reuni cu San Nicolas Business Association (SNBA) pa trata diferente topico importante pa San Nicolas y turismo. A papia entre otro riba diferente proyecto andando cu A.T.A. ta forma parti di dje, como tambe proyectonan cu ta na caminda relata cu mehoracion di producto y experiencianan na San Nicolas, como trambe promocion di San Nicolas.
Puntonan di enfoke ta inclui branding di San Nicolas, restoracion di trapi na Rodger’s Beach y siguiente pasonan pa cu esaki, proyectonan di e asina yama “amenities committee” cu ta enfoca entre otro riba un atraccion nobo na San Nicolas, e oficina di turismo na San Nicolas, Master Plan Seroe Colorado, borchinan di informacion y diferente eventonan incluyendo e Aruba Art Fair.
Durante e reunion aki Armando Goedgedrag a splica tambe e idea tras di e mural nobo cu e a pinta, comisiona door di A.T.A. Partidonan a keda sumamente satisfecho cu e trabao di Armando cu ta sigui duna realse na un centro di San Nicolas artistico y cultural, dorna pa diferente mural. Pa medio di e Aruba Art Fair, di cual e siguiente edicion lo tuma luga na November e aña aki, lo sigui duna atencion na e aspecto aki.
Den e siguiente lunanan lo sigui traha conhuntamente cu diferente socio riba proyectonan nobo pa San Nicolas. A.T.A. ta spera di por sigui conta cu sosten di comunidad pa e proyectonan aki. Lo sigui ta den contacto estrecho cu San Nicolas Business Association.
