TURISMO TA BAYENDO BON

ORANJESTAD, Aruba

“E exito den turismo lo conduci na recuperacion di nos economia, mas lihe”

Durante su discurso dirigi na pueblo di Aruba diadomingo ultimo, Prome Minister Evelyn Wever-Croes a expresa cu turismo ta bayendo bon apesar cu Aruba a pasa den tempo dificil e ultimo dos añanan pa motibo di e pandemia. Aruba ta mirando luz na Horizonte.

 

Ora cu nos a kere cu nos por recupera trankilamente despues di e pandemia, a bin otro crisis cu ta afecta nos grandemente, e conflico di Ukraina cu tin efectonan devastador pa henter mundo. Prijsnan di crudo y gasolin a aumenta drasticamente den tur pais. Na Aruba tambe, pasobra Aruba ta importa e gasolin. Prijsnan di productonan den supermercado tambe a cuminsa aumenta, pasobra na e pais cu nan ta wordo produci tambe nan a aumenta. Y nos ta importa e productonan aki combina cu e efectonan economico.

 

A pesar di e realidad critico aki, Gabinete Wever-Croes II a mantene su vision y direccion di maneho consistentemente y ta mirando cu Aruba ta riba e caminda pa recuperacion. Nos recuperacion awor ainda ta basa riba recuperacion di nos turismo, cual ta bayendo hopi bon. Den e ultimo 3 lunanan, april, mei y juni 2022, tawata tin mas turista cu a bishita Aruba, cu prome cu e pandemia. Total 294 mil turista a bishita nos pais durante e tres lunanan aki, compara cu 281 mil den e 3 lunanan april, mei y juni na 2019. Minister Dangui Oduber su maneho ta pa percura cu e tendencia aki continua, y den e caso aki nos ta calcula cu nos lo finalisa e aña aki cu un recuperacion entre 90 pa 95% di nos turismo, y otro aña, nos lo yega nivelnan di prome cu pandemia.

 

“E exito den turismo lo conduci na recuperacion di nos economia, mas lihe. Nos no a sali ainda di tur efecto negativo di e pandemia, ketu bay tin hopi hende ta lucha, pero nos ta riba e bon caminda si, y tur proyeccion ta indica cu pa fin di e aña aki nos ta logra yega cerca di 100% di recuperacion economico. Y pa esaki den nomber di Gobierno di Aruba, mi kier gradici tur esnan cu ta labora duro den e area di Turismo. Danki pa bo servicio di calidad, danki pa bo atencion cu cordialidad, cu ta laga nos turistanan stima nos pais, y bolbe bishita nos den futuro”, Prome Minister Evelyn Wever-Croes a expresa.