Reflexions a haya rason di Corte y haya compensacion

Dia 27 di juli tabatin sentencia den e caso cu e doñonan di Reflexions a cuminsa contra doñonan di e ex edificio di Havana. Sin cu Reflexions a logra haya conexion di awa y coriente y doño di exHavaneta a kita e instalacionnan aki perhudicando e beach bar, cu ta uno hopi popular.
Corte di Prome Instancia, den e procedura a emiti medidanan preliminar den cual ta ordena Navarra cu ta e doño di e ex edificio di Havana pa drecha y mantene e red di coriente pa e area (cu Dontom ta uza) for di un di e terenonan erfpacht den 24 ora despues di e decision di Corte. Pa cada cada dia of parti di dia cu Navarra no cumpli, lo mester paga un boet di 2.500 florin te cu un maximo di Afl. 150.000,–.
Tambe Corte a ordena Navarra pa paga Dontom, como adelanto, un suma di Afl. 15,580,– cu ta pa gastonan haci ora cu a kita coriente y mester a haci uzo di un generator. Ta ordena Navarra pa paga gastonan di Corte di Dontom calcula na Afl. 1,475,– di cual Afl. 1,000 ta pa gastonan di Abogado; ta ordena Pais Aruba informa Elmar prome cu 14 dia transcuri desde e sentencia, cu nan ta permiti pa uza e parcela te ora cu tuma un decision riba e peticion pa un precario vergunning, cu un boet di 500 florin pa cada dia cu pais Aruba no cumpli cu e ordo aki, te cu un maximo di Afl. 25,000. Tambe ta ordena pais Aruba paga e gastonan di procedura di Dontom, calcula na Afl. 1,475,- di cual Afl. 1,000.— ta pa gastonan di Abogado. E veredicto aki ta ehecutabel di inmediato.
Den e caso di contra demanda di Navarra contra Dontom, Corte a rechasa e resto; ta rechasa e otro peticionnan den e contra demanda y ta ordena Navarro paga e gastonan di Dontom calcula na Afl. 500,- di salario di abogado.
Pues pa awe Elmar mester a pone e coriente caba pa Reflexions.
E decision aki a wordo emiti door di Mr. J.A. van Voorthuizen, Hues di Corte di Prome Instancia, y anuncia den un sesion publico riba diaranson, 27 di juli, 2022, den presencia di Griffier.