Minister Rocco Tjon: A APUNTA DIRECTIVA NOBO TEMPORALMENTE PA STICHTING KINDERTEHUIS IMELDAHOF A PETICION DI E DIRECTIVA SALIENTE

“mi ta garantisa comunidad cu e unico interes di parti di gobierno y di mi como e minister encarga, ta pa garantisa e siguridad fisico y emocional di tur e muchanan cu ta hospeda na imeldahof. Particularmente teniendo na cuenta cu mayoria biaha, e muchananan aki ya caba a pasa den un trauma of un situacion familiar insigur pa cual motibo nan ta na Imeldahof”

ORANJESTAD – Recientemente, minister di Husticia y Asuntonan Social a aclarea cierto puntonan pa loke ta trata Stichting Kindertehuis Imeldahof (SKI), mirando cu den medianan di comunicacion por a nota diferente speculacion cu no ta cuadra cu realidad. Esaki ta di lamenta, mirando cu a yega na palabracionnan concreto cu e directiva saliente, pa mantene e informacion discreto, pa e bienestar di esnan cu ta hospeda na imeldahof, sinembargo esaki no tawata e caso, pa cual motibo a aclarea e situacion por completo a traves di un conferencia di prensa.

Stichting Kindertehuis Imeldahof ta un fundacion completamente independiente cu ta carga un responsabilidad grandi y ta eherce nan tareanan den nomber di pais Aruba. Anualmente, pais Aruba ta aloca miyones di florin pa nan por eherce nan tareanan. Teniendo na cuenta cu nan ta e unico fundacion cu e responsabilidadnan aki pero tambe e unico fundacion cu pais Aruba ta confia cu e tareanan aki, e ta importante pa percura pa e aspectonan financiero como tambe e aspecto di “good corporate governance” ta bon regla.

Segun minister Tjon, como un mandatario di pais Aruba, e deber ta pa haci lo responsabel y bin cu cambionan, naturalmente stipula pa ley, na momento cu tin suficiente indicacion cu cosnan no ta canando bon. Bisando esaki, por menciona cu tin puntonan cu a wordo treci padilanti na ministerio di Husticia y Asuntonan Social pa loke ta trata e situacion financiero di e fundacion cual ta indica cu tin un debe cu pais Aruba di mas cu cuater miyon florin. Di otro banda, a wordo confronta tambe cu un rapport cu ta toca e “leefklimaat” pues e siguridad di e muchanan ubica eynan, cual tawata uno asina alarmante cu el a conduci na combersacionnan serio cu Ministerio Publico, specificamente cu e procurador general. Banda di esaki, e statuten ta data di aña 1976, pues ora ta papia di “good corporate governance” e ta hopi imporante pa e statutennan ta actualisa y no di añanan 70. A base di e puntonan aki, a hiba un combersacion cu e directiva saliente y a splicanan cu e situacion no por sigui asina, cual nan a compronde y boluntariamente a entrega nan retiro.

Un otro punto importante pa aclarea ta e carta cu a wordo manda na e directiva anterior, caminda por wak claramente cu a solicita na nan pa no nombra un directiva nobo y laga esaki den man di corte, mirando cu segun ley y e statuten di e fundacion, corte ta e caminda indica pa nombra un directiva nobo. Banda di esaki por mira den un carta cu ministerio a ricibi di e fundacion, unda nan a haci e peticion pa ministerio mes nombra un directiva temporario, pa percura pa por tin un traspaso lihe pa atende cu tur e retonan.

Por ultimo, ta conclcui cu en berdad fundacion Imeldahof ta completamente independiente, sinembargo, bou di nan propio peticion, ministerio di Husticia y Asuntonan Social a scoge un directiva nobo temporalmente. E miembronan cu a wordo apunta ta profesionalnan cu hopi experencia den liderazgo, “good corporate governance”, e parti huridico, e parti financiero, y hopi importante, un profesional cu hopi experencia den e parti social pa cu e muchanan aki.