MINISTER ENDY CROES TA FELICITA SRA. NELKIS Y SR. ALVIN ARENDS CU APERTURA DI CHOCOGLAM DEN CENTRO DI CIUDAD.

ORANJESTAD: Diabierna anochi Minister Endy Croes a presencia un otro bunita ceremonia di apertura ta trata aki di Chocoglam cu a habri su porta den Caya Betico Croes, patras den e edificio di Maggy’s Oranjestad. Un soño di sra. Nelkis cu a inicia 8 aña pasa na cas awe a bira un realidad. Minister Endy Croes a hiba palabra durante e anochi ameno unda e la expresa cu Gobierno di Aruba a decreta 2022 como un aña di inversion y oportunidad. Bo por wak e curashi, vision y amor tey pa por lucha pa bay dilanti den bida. Nos semper tey pa duna sosten, pa guianan den e proceso pa nan ta exitoso den bida. E mandatario enfatisa riba e 4D cu e ta uza regulamente den su discursonan. Den e caso aki sra. Nelkis tabatin un deseo, tabata disciplina y keda lucha pa sali for di nan cas y awe nan ta den centro di ciudad. E di 3 D ta di dedicacion, nan a dedica masha hopi pa awe logra loke nan ta logrando y cu sosten di pueblo di Aruba pa por engrandece y di 4D di determinacion, nan a pasa den duro pero a keda determina pa logra nan soño. Sra. Audrey Lacle a corta cinta y asina Chocoglam a habri oficialmente.

Palabra di elogio na sra. Audrey Lacle cu ta duna oportunidad na comerciantenan local ta di aprecia. Chocoglam netamente un chucalati dushi di diferente sabor y traha aki na Aruba. Finalisando Minister Endy Croes a recorda un dicho di nos libertador Betico Croes; tur cu yega Aruba  y haci Aruba nan cas ta un Arubiano.  Den nomber di Gobierno di Aruba masha pabien na sr. Alvin y sra. Nelkis Arends. Hopi hopi exito.