BON BIAHE Y EXITO NA TUR STUDIANTE BIAHANDO PA HULANDA

ORANJESTAD, Aruba

Dialuna 1 di augustus, e prome grupo di studiante ta biaha pa Hulanda pa continua cu nan estudio y diamars 2 di augustus e otro grupo lo sali pa Hulanda pa continua cu nan estudio. Den nomber di Gobierno, Prome Minister Evelyn Wever – Croes ta desea e studiantenan tur cos bon y un bon biahe.

 

Den total tin 180 studiante cu ta biahando cu Arubalening pa Hulanda. Prome Minister Wever – Croes a splica cu unabes cu e studiantenan yega Hulanda, conhuntamente cu Minister Plenipotenciario Ady Thijsen, lo tey pa ricibi nan.

 

Prome Minister ta desea mayornan cu tin yiunan biahando e dos dianan aki, pa ta fuerte y ta encurashanan pa keda recorda nan yiunan riba e norma y balornan cu nan a ricibi di nan cu ta e fundeshi pa e proceso nobo aki cu nan lo encamina. “Recorda nan riba e norma y balornan cu bo a siña nan pa asina ora cu nan yega Hulanda, nan por establece nan mes mas facil.”

 

Premier Wever – Croes a remarca cu na Hulanda Arubahuis ta haciendo su esfuerso pa por regla e opvang di e studiantenan, pa nan por cera conoci cu nan ciudad y pa nan haya introduccion di kico ta e bida na Hulanda. “Hulanda no ta facil mas, haya cas na Hulanda ta un problema grandi pa e propio Hulandesnan, pues haya camber pa studiantenan ta un reto grandi,” Prome Minister a enfatisa.

 

Ademas, a compronde cu ainda tin algun studiante cu no a keda cla cu camber, y ta hopi inportante pa nan tuma contacto cu e mentor inmediatamente pa mira con por regla esaki.

 

Prome Minister Wever – Croes ta duna e siguiente mensahe: “Hulanda no ta facil pa biba ni pa adapta, pero si nos studiantenan traha duro y nan tuma nan estudio na serio, nan por logra cosnan grandi. Pa nos como mayor, ta momento pa habri hala y laga nan bay. Den nomber di Gobierno di Aruba, mi ta desea studiantenan un bon biahe y hopi exito cu nan estudio na Hulanda”.