MINISTER ENDY CROES A ATENDE E ‘DEADLIFT CHALLENGE’.

ORANJESTAD, Aruba

Diasabra anochi Minister Endy Croes acompaña pa su esposa sra. Dilalah Croes a atende e ‘Deadlift Challenge’ organisa pa Paradise Strength Aruba bou liderazgo di e coach Jonathan Wever. Un total di 50 atleta a participa representando shete diferente gym riba nos isla. Di cual 17 dama a competi demostrando asina cu e deporte di forsa ta pa tur hende. A midi e forsa absoluto di atletanan, den forma di un ‘1 Rep Max Deadlift Challenge’. E atletanan a haya e tres oportunidad pa por lanta e peso mas pisa nan tabata por pa 1 ripiticion den e disciplina di ‘deadlift’.

Por ultimo, Minister Endy Croes ta felicita e organisadonan pa un tremendo evento cu a surpasa tur expectativa. Palabra di pabien na Andrew Jansen di BFM gym ganado absoluto hisando 345 kilo. Pabien na tur e atletanan cu a participa como tambe e ganadonan cu a haci e evento exitoso. Danki pa tur esnan cu a aporta, sostene como tambe tur boluntario cu a haci e competencia aki posibel. Cu 4D, Deseo, Disciplina, Dedicacion y Determinacion ta logra.