Parlamentario Shailiny Tromp-Lee (MEP): Gobierno ta logra preveni introduccion di “eigen bijdrage” di AZV

Dia 17 di mei 2022 Parlamento a ricibi e ontwerp-landsbesluit pa pa loke ta trata cambionan den e ley di AZV. Como Parlamento nos tabatin 2 siman di tempo pa por vocifera nos deseo of obhecionnan. Dia 31 di mei 2022 mi a manda un carta oficial di mi opinion y deseonan al respecto.

 

Carta di dia 31 di mei 2022: esnan mas vulnerabel den nos comunidad mester mantene acceso di cuido pa cu nan salud y un cobertura (acceso) amplio di cuido

Den mi carta un biaha mas mi ta urgi Gobierno di Aruba pa crea un sistema resiliente pa atende cu nos aseguradonan prome cu ehecucion di cualkier cambio. Alabes mi a enfatisa e hecho cu Gobierno mester sigura cu e personanan mas vulnerabel den nos comunidad y entre otro esnan cu tin problema cu mobilidad no keda limita e acceso di cuido pa cu nan salud y pa nan sigui mantene e cobertura (acceso) amplio di cuido. Pesey mes mi a indica den mi carta cu na momento cu introduci cambio of bin cu ahustacion, esaki mester ta den combinacion cu presentacion di un sociaal vangnet. Cu otro palabra mi a indica na Gobierno cu e introduccion di e diferente contribucion propio door di aseguradonan por keda introduci unicamente si esaki ta bay simultaneamente acompaña cu introduccion di dicho sociaal vangnet.

 

Gobierno a dicidi pa no introduci eigen bijdrage y presenta alternativa

Dialuna, 1 di augustus 2022 den conferencia di prensa di gobierno Minister di Salud Publico sr. Dangui Oduber a papia riba e tema di e Landspakket di cuido cu ta e parti F3. Minister a indica cu e ultimo añanan esaki tabata un tema di discusion entre Aruba y Hulanda sigur pa loke ta trata e reduccion di 60 miyon. Minister Oduber tambe ta di opinion cu si mester introduci un eigen bijdrage esaki mester bai man den man cu un vangnet pa proteha tur e personanan cu ta vulnerabel na Aruba. Gobierno ta indica cu CAFT no tabata di acuerdo cu e proposicion aki, pasobra segun nan e grupo aki ta demasiado amplio y lo costa pais Aruba miyones di florin.

 

Esaki a pone cu Gobierno a dicidi pa no introduci e eigen bijdrage y a busca otro alternativa pa logra reduci gasto di AZV. A haya un otro alternativa pa substitui e introduccion di e eigen bijdrage. E alternativa ta trata reduccion di gastonan di remedi, cual na calculacion preliminar lo por spaar nos 6 pa 8 miyon florin.

 

Den luna di juni 2022 a formalisa e establecimento di e “Dutch Caribbean Hospital Alliance” (DCHA) y a aproba cierto proyecto pa cuminsa cu e cooperacion. E intencion pa asina e hospitalnan por traha na un manera mas estrecho cu otro pa asina por brinda un miho cuido. E aliansa aki lo bay haci compras nan di remedi en conhunto pa asina haya un prijs mas faborabel.

Pa aña AZV ta gasta 30 miyon florin na remedi, esaki ta un gasto hopi substantial. Door di e alternativa aki Aruba ta bay spaar casi 2 biaha mas hopi cu e eigen bijdrage lo a spaar nos. Un alternativa cu sigur ta preveni un impacto riba e cartera di nos hendenan. Un solucion cu sigur ta di aplaudi.

 

Pesey mes mi kier a termina elogiando e hecho cu Gabinete Wever-Croes, mei mei di tur incertidumbre y retonan financiero di nos pais, ta sigui busca solucionnan na beneficio di nos pais. Mi ta gradici Minister Dangui Oduber cu ta sigui haci su maximo esfuerso pa mantene un cuido eficiente y efectivo y cu e cuido cu nos ta brinda na nos cuidadanonan ta keda uno di calidad, sostenibel, accesibel y pagabel. Alabes dunando oido na Parlamento su peticion y deseonan.