Minister Ursell Arends: Ta sigui combersa cu agricultornan

Den weekend ultimo Minister di Naturalesa, Sr. Ursell Arends, acompaña pa su Sra. a bishita diferente greenhouse di Cunucu Fresh. Aki por presencia con Cunucu Fresh, un compania netamente local dirigi pa Sr. Rudolf Arends, a inova den transcurso di tempo pa por mehora nan practica di agricultura local.

Cunucu Fresh durante ultimo tempo a expande y  tin diferente greenhouse unda ta planta diferente tipo di berdura. Sigur un proyecto sumente interesante unda cu ta haci uzo di e sistema hidroponico (“hydroponics”).

Hydroponics, un metodo unda ta crece mata sin mester di suelo, tambe ta uza menos awa cu sistema tradicional di planta den suelo. Banda di esaki e ta laga e mata crece mas liher y tambe subi su produccion di berdura of fruta.

Tin demanda pa productonan local. Minister Arends hunto den combersacion cu e director a toca e tema: Con gobierno por yuda agricultura miho?

Un di e sugerencianan – cual Minister Arends conhunto cu Santa Rosa kier bin cu’ne – ta un pa certificacion pa productonan local. Asina tin un seyo cu por asegura e calidad di cada producto cu ta wordo bendi riba mercado local, y tambe pa productonan pa exportacion – algo cu ta actualmente dificil pa falta di dicho certificacion. E ultimo aki ta crea e oportunidad pa nos agricultornan local por cuminsa exporta nan productonan tambe, habriendo porta pa mercadonan nobo y hopi mas grandi.

Minister Ursell Arends ta gradici Cunucu Fresh pa a habri nan porta pa su bishita y kier a desea nan tur clase di exito y cu por conta cu e sosten di dje y di Gobierno di Aruba pa tuma e sugerencianan den consideracion y sostene iniciativanan manera esaki activamente. “Nos lo sigui desaroya nos siguridad di alimentacion”.