‘Amiganan pa semper’

E ultimo deseo di e mama di Sofia tawata pa nan strooi su shinishi na e pais na unda e la nace.  Hunto cu su 4 amiganan Sofia ta dicidi di cumpli cu e deseo di su mama y ta sali di biahe rumbo pa Colombia.                                                                                              E biahe, cu na prome instante ta mustra di bira uno placentero, no ta bay manera plania y e amiganan ta haya nan mes confronta cu diferente reto. Retonan cu ta test nan amistad pero tambe nan curashi.

Si abo kier sa con Sofia y su amiganan ta pasa na Colombia, bo no por perde e obra nobo teatral di sra. Faritah Luidens di dia 2 y 3 di september na Cas di Cultura.

Ken no conoce Faritah Luidens? Un cantante, comediante, actriz y escritora cu tin un trayectoria artistico desde cu e tawata tin apenas 17 aña di edad.

Prome Faritah a cuminsa cu canto y despues a dicidi di drenta den e mundo di teatro. Hopi ta esnan cu conoce Faritah como e personahe humoristico ‘Tica Basha Abao’.  Tica, te e dia di awe, ta stima pa grandi y chikito y tin como personahe un luga masha special den nos comunidad.

Pero Faritah su soño tambe tawata pa cuminsa skirbi obranan pa su pueblo stima. No solamente pa promove teatro, pero tambe pa invita otro pa sigui nan soño y asina tambe aporta na arte y cultura na Aruba.                                                                    Despues di 2 aña dedicando su mes na su soño, su prome obra yama ‘Amiganan pa semper’ ta cla pa presenta na e luna di september.                                                 ‘Amiganan pa semper’ ta un obra yena cu aventura y humor cu simplemente bo no por perde!

Faritah mes a dirigi y produci e obra aki.                                                                               Como actriz e sa e importancia di un bon elenco. Un elenco cu desde comienso a dedica nan mes na e obra, cu nan talento di kita sombre. E elenco ta consisti di Nilka Franka, Lilian Pieters, Amy Richards, Faridi Daou, Meredith Rafael, Edjean Semeleer, Israel Luidens y Jason Croes.

E soño aki nunca no lo a bira realidad si no ta pa e confiansa, apoyo y sosten financiero di UNOCA.

Tambe ta gradici DCA, ISLAND FINANCE, GO-CULTURA, JASON CR y CLICKPRINT pa nan contribucion valioso!

E obra lo wordo presenta dia 2 y 3 di september na Cas di Cultura y lo cuminsa pa 8or pm. Portanan lo habri pa 7:30 p.m.                                                                              Carchinan ta obtenibel na Plaza Bookshop Aruba, Superfood, Cas di Cultura y na Checkpoint Color.                                                                                                                 Tambe por yama Faritah pa reserva bo carchi na 5663711.                                                 E entrada ta solamente Awg. 25,- .