Investigacion di caida mortal na Paseo Herencia

Bao guia di Ministerio Publico, Polis ta investigando morto di Luis Angel Figueroa Flores di 20 aña di edad, kende riba 17 oktober ultimo a cay desde piso mas halto di Paseo Herencia. E investigacion aki no ta cla ainda y no a detene ningun sospechoso.

Generalmente Ministerio Publico no ta bisa nada den casonan asina unda no tin un sospechoso deteni ainda.
Pero den e caso aki ta otro, mirando cu e team investigativo a bin ripara cu riba social media tin hopi informacion y noticianan incorecto circulando tocante e caso.
E informacionnan y noticianan aki, cu ta wordo presenta como berdadero, en realidad ta resulta di no ta berdad.
Por ehempel, tin un persona cu a publica un video tocante e supuesto hechonan rond di morto di Figueroa, y cu despues a wordo yama pa Polis y scucha como testigo, unda el a bin na admiti cu ta inventa el a inventa tur esaki.
Mester ta duidelijk na un y tur cu esaki ta costa hopi capacidad di Polis y ta bay a costo di e adelanto y conclusion di e investigacion.
Ademas e rumornan y noticianan falso aki riba social media ta innecesariamente causa mas dolor ainda cerca famia di e difunto.

Polis ta spera di completa e investigacion medio maart, mientrastanto e famia lo wordo informa tocante e resultadonan, despues di cual decisionnan por wordo tuma.

Ta haci un yamada na testigonan cu ainda no a bin dilanti, pa meld nan mes na Recherche di Noord of tuma contacto cu tiplijn na telefon 11141.