SEGUN E ENCUESTA DI ATA DI MEI 2022, E ARUBIANO TA SATISFECHO CON TURISMO TA DESAROYANDO NA ARUBA

ORANJESTAD, Aruba

Turismo ta Aruba su unico pilar economico y esaki tin un efecto grandi riba e bida di nos ciudadanonan. Pa midi e efecto cu turismo tin riba nos poblacion y sa kiko ta e sintimento cu ta biba den nos comunidad pa cu turismo, economia y e parti social, Aruba Tourism Authority (ATA) a haci un encuesta. Minister Oduber ta haya cu e encuesta aki ta hopi importante pa gobierno por sa e sentimento cu ta reina na Aruba, specialmente saliendo di un pandemia cu tabata tin un efecto hopi negativo pa mundo henter.

Minister Oduber a duna di conoce cu ATA a haci e encuesta na nos residentenan. A haña asistencia di entre otro studiantenan di Universidad di Aruba, cu a yuda colecta data. Mester bisa cu e tipo di encuesta aki ya caba a yega di wordo haci den pasado na aña 2005 y tambe por ultimo na aña 2018.

E encuesta a keda haci na diferente forma y plataforma, por a hacie personal, tambe riba website, facebook, instagram, via QR code etc. Un total di casi 2 mil persona a participa den e encuesta aki di tur edad, sexo, districto, status legal, status di empleo y nivel di educacion. Es decir e encuesta ta conta cu tur grupo di nos comunidad su opinion.

Locual tabata remarcabel ta cu compara cu e añanan anterior e sentimento pa desaroyo social (56%) e aña aki a haya un puntuacion mas halto cu e sentimento di desaroyo economico (44%). Mas hende ta di opinion cu nos mester inverti mas den e desaroyo social, esaki por conclui cu ta door di e efecto di e pandemia.

Pa locual ta e impacto cu turismo tin riba famianan Arubiano y local, e sentimento aki a haya un puntuacion positivo di 3.6 (di 1-5). E impacto cu turismo tin riba e bida di nos hendenan a score 3.8 (di 1-5), pues tambe ta positivo. E cifranan aki ta yena minister Oduber cu un satisfaccion, tambe e forza pa sigui traha na e bienestar di nos pueblo trahado.