Cumpra Local pa stimula nos empresanan local
ORANJESTAD, Aruba
Minister di Asunto Economico, Comunicacion y Desaroyo Sostenibel, mr. Geoffrey Wever ta contento di por aporta na e campaña di Cumpra Local, organisa pa DEACI su division di IDEA (Iniciativa pa Desaroyo di Empresa Arubano).
No ta prome biaha cu IDEA ta bin cu un iniciativa asina. E meta ta pa sostene empresanan local den cualkier forma posibel – den e caso aki cu promocion – asina dunando un empuhe na Aruba su economia di empresanan chikito y mediano.
Den e temporada aki a enfoca riba empresanan cu ta conoci pa tin productonan di “back to school”, cual por mira via Cumpra Local su facebook page y demas medionan di comunicacion.
E oportunidad ta keda habri pa cualkier empresa registra, por tuma contacto cu DEACI su division di IDEA, pa asina mira con abo tambe por forma parti di e campaña di Cumpra Local.
Un apelacion ta bai na comunidad henter, pa e temporada di back to school, pa considera cumprando local y asina aporta directamente na empleo local y brinda empuhe y sosten na Aruba su economia. “Nos ta compromete pa stimula, motiva y defende e interesnan di nos empresarionan local”, minister Wever.
