Minister Xiomara Maduro ta invita pueblo henter pa sintonisa un programa informativo

ORANJESTAD, Aruba

Historia di sclavitud ta un topico actual den Reino. Dia 1 di juli 2022 a conmemora 159 aña  di abolicion di sclavitud door di Hulanda den e colonianan di Surinam y Antias Hulandes. Den e cuadro di esaki Ministerio di Cultura a traha un programa tocante e historia di sclavitud na Aruba, ya cu investigacionnan a demostra cu na Aruba tambe tabatin esclavo. Minister Xiomara ta subraya cu aunke e cantidad di esclavo tabata menos en comparacion cu e otro islanan den Reino, e ta forma parti di Aruba su historia di sclavitud.

E mandatario ta informa cu durante e programa informativo, por disfruta di un poema dedica na e historia di sclavitud, trece pa srta. Marilis Becker, ganadora di Poeta di Patria 2022. Por medio di arte nos comunidad ta haya un bista di storianan historico no mucho conoci na Aruba.

Seguidamente sr. Luc Alofs, historiado cu a investiga tocante e historia di sclavitud na Aruba y autor di varios buki, entre otro ‘Slaven zonder plantage’ ta conta un parti di resultado di su investigacionnan durante e temporada di sclavitud na Aruba.

Sr. Edric Croes, hefe di departamento di cuido y maneho di archivo na Archivo Nacional Aruba (ANA) ta splica e rol importante cu ANA tin pa comunidad di Aruba y ta conta algun storia durante di tempo di sclavitud na Aruba, pruebanan cu ANA a acumula.

Un di e pruebanan aki ta e unico ‘vrijbrief’ cu Aruba tin, cu ta e ‘vrijbrief’ di Anna Stacia Helder, durante cual sr. Virgilio Davelaar, casa di sra. Benita Davelaar-Helder, ta conta tocante di e ‘vrijbrief’ di tanta grandi di su casa.

Sra. Nadia Dresscher, sociologo ta comparti su historia personal for di punto spiritual y scientifico tocante di su descendencia di esclavo.

Psicologo Dimitiri Halley ta conclui cu un splicacion dicon aceptacion di pasado ta asina importante pa un persona y Pais.

E programa ta un compilacion di diferente aspecto di arte, investigacion scientifico, experiencia personal y conseho profesional pa asina por haya varios punto di bista di e historia di sclavitud na nos Pais y e importancia pa su reconocemento y aceptacion.

 

 

Minister Xiomara Maduro ta splica cu como Arubiano ta masha importante pa nos conoce nos pasado, pa compronde nos presente y asina yuda nos fiha unda nos kier bay den futuro. Sclavitud tambe a forma parti di nos pasado y p’esey ta importante pa nos conoce e historia aki tambe pa evita cu nan por ripiti den presente y futuro.

 

Minister di Cultura ta invita pueblo di Aruba pa sintonisa Telearuba, diamars dia 16 di augustus, 9.10 di anochi y dia………….na Diario TV, durante cual lo pasa e programa informativo ‘Historia di Sclavitud’ na Aruba.

 

FIN