Presidente di Parlamento mr. Edgard Vrolijk den su relato semanal di “Presidente di Parlamento ta informa”, edicion 3

ORANJESTAD, Aruba

Awe den di tres edicion di Presidente di Parlamento ta informa lo trata e Regeling Ondersteuning Fracties in de Staten van Aruba (despues: Regeling Fractieondersteuners) y e Richtlijnen Fractieondersteuners.

 

Regeling Fractieondersteuners y Richtlijnen Fractieondersteuners

Na aña 2011 a bin cu un Regeling Fractieondersteuners unda cu porfin a logra pa Parlamentarionan manera e ta regla na Hulanda, por haya ayudo den nan trabao. Pa cu esaki a introduci un regeling conoci como ‘Regeling Ondersteuning Fracties in de Staten van Aruba’. Den esaki ta reglamenta e destinacion di e placa pa Parlamentarionan pa yudanan mehora den nan funcionamento pero sigur tambe pa nan por sigui adkiri mas conocemento. Den e regeling ta stipula tambe cu pa por ricibi e fondonan, e fraccion mester lanta un fundacion. E fundacion aki ta esun cu ta emplea e fractiemedewerkers y ta paga cu e placa cu ta ser deposita pa e meta aki. E parti mas fuerte di e ley aki tabata cu tur placa cu sobra tur aña ta verreken cu e siguiente aña y na final tur placa cu no a ser usa ta bay bek pa caha di gobierno.

 

Cambio di Regeling Fractieondersteuners na 2015

Na aña 2015 a trece diferente cambio den e Regeling Fractieondersteuners. E cambionan mas primordial tabata cu a amplia e cuadro na kico por destina e placa pa mehoracion di funcionamento di e parlamentario y tambe e placa destina pa e parlamentario y fractieondersteuners por a keda acumula, pues no mester a verreken mas anualmente. Si e fraccion keda den parlamento despues di eleccion, tur sobra di placa cu a keda atras riba cuenta ta keda na disponibilidad di e fraccion y no mester a debolbe e placa mas na caha di gobierno.

 

Caso Diamante

E cambionan cu a keda introduci na 2015 tabatin su peligernan cun’e. Pueblo por corda caso Diamante na unda cu un Parlamentario ta ser acusa di malversion di e fondo aki. E posibilidad a wordo crea a consecuencia di e cambio den e regeling na 2015 cu a permiti acumulacion. Y sigur locual mas a crea problema ta na momento cu e fraccion no tin un fractieondersteuner, pero placa ta sigui ser deposita pa paga esaki y ta keda acumula y a bira un suma bastante tentativo. Sigur ta netamente un di e consehonan di Centrale Accountants Dienst (CAD) ta cu e fractieondersteuner mester tin un contracto cu e stichting pa hustifica e placa cu ta destina pa esaki. Tin fraccion cu ta usa personanan freelance cu in principio ta bay contra un di e motibonan pakico a bin cu e Regeling Fractieondersteuner y cu mester wordo hustifica esaki den e relato anual cu hopi biaha no ta pasa.

 

Kico a haci pa impedi pa no tin ripiticion di caso Diamante den Parlamento

Dibiaha a busca CAD pa repasa e regeling existente y duna nos su consehonan kico por haci pa mehora esaki y sigur pa impedi cu tipo di accionan asina lo ripiti facilmente. Nos a haya esaki y CAD a bin den Commissie Huishoudelijke Aangelegenheden (CHA) personalmente pa splica kico tur mester wordo cambia. Nos ta den e proceso aki y mester bay CHA un bes mas pa caba di tuma algun desicion riba esaki pa por finalisa y hancranan den e regeling nobo den un reunion publico.

 

Entregamento di relato anual

Sigur den cuadro di mi trabao ya tur fraccion den Parlamento a ricibi nan carta pa recordanan e fecha di 31 di augustus 2022 pa entrega di e relato anual. Na e momentonan aki no tin ningun sancion den e regeling si no entrega e relato anual. Un di e cambionan den futuro lo ta cu si no entrega e relato anual lo stop e traspaso di placa te ora e relato anual ser entrega.

 

Den proximo edicion 4 lo enfoca kico no a logra, entre otro independisacion di Parlamento, renobacion di Parlamento y metanan pa 2022-2023.

 

Pa mas informacion por subi riba Parlamento di Aruba su website na www.parlamento.aw of por bishita nos pagina di Facebook: ‘Parlamento di Aruba’.