Premier Evelyn Wever – Croes: ENCUENTRO VIRTUAL ENTRE PREMIER NAN DI REINO Y SECRETARIO DI ESTADO VAN HUFFELENg

A trata e ley alternativa di Coho cu Aruba ta trahando riba dje

 

ORANJESTAD – E siman aki a tuma luga un reunion virtual entre Secretario di Estado Alexandra van Huffelen hunto cu Premier di Corsou sr. Gilmar Pisas y Premier di Sint Maarten sra. Silveria Jacobs. Durante di e reunion a trata diferente tema, sinembargo esun mas importante tabata unda ta para na e momentonan aki cu e leynan di COHO. Ta tene e tipo di reunionnan aki regularmente pa trata temanan en comun.

 

Manera ta conoci, na luna di juni ora cu Secretario di Estado van Huffelen tabata na Aruba y a reuni cu e Premier nan di Corsou y Sint Maarten, e paisnan a indica na Secretario di Estado cu nan no tin sosten di Parlamento pa e ley di Reino di COHO.

Na e ocasion a palabra, cu Aruba lo traha riba un alternativa pa e COHO. Durante e reunion virtual cu a tuma luga,  a delibera riba con ta bayendo y con leu ta, cu e alternativa.

Prome Minister Wever – Croes a indica cu ta calcula cu pa fin di e luna aki,  lo tin un concepto cu por delibera riba dje. Otro luna (september) lo tin un otro reunion entre  Secretario di Estado van Huffelen, Premier Pisas, Premier Jacobs  y Prome Minister Wever – Croes, pa trata e alternativa aki.

E ta un hecho cu Aruba, Corsou y Sint Maarten a indica cu nan no tin sosten di Parlamento pa e Consencus Rijkswet di COHO, pues ta trahando riba un alternativa, Premier Wever – Croes a enfatisa.

 

E tipo di reunionnan aki ta importante pa por keda den contacto cu otro y dialoga riba temanan en comun. Otro temanan cu a trata den e reunion ta decisionnan cu ta wordo tuma den Conseho di Minister di Reino y e Landspakket. Pa Aruba, e tema di conseho pa aanwijzing ta un tema actual, pero esey no ta wordo trata den e tipo di reunionnan aki hunto cu e otro Premier nan.

Concluyendo, Prome Minister a bisa cu e siman aki lo papia di esaki si, cu Secretaio di Estado van Huffelen  como cu e ta un tema cu ta concerni Aruba.

Asina ta trahando cu tur esfuerso pa evita e aanwijzing y pa asina Aruba por sigui den e rumbo di recuperacion.