Minister Endy Croes no ta comprende cu tin continuidad di gobernacion
Riba Diahuebs Santo minister Endy Croes ta haya ta bon pa no bisa full e berdad en cuanto scol St. Aloysius y mita berdad tambe ta un mentira. E berdad tras di e renovacion di scol St. Aloysius ta lo siguiente. No mucho tempo atras prome cu mi a bira minister di educacion e dak di St. Aloysius a wordo renova pa un balente suma di placa y toch e prome noticia cu mi a haya como minister ta cu e dak ta lek, plafon a bin abao, muraya na werki, etc. Nos a evacua e scol na un edificio temporario pa por cuminza cu e trabaonan. E conseho final cu a bin ta mihor โslopen linkervleugelโ pa evita cu den poco tempo ta den mesun situacion. SKOA a nenga pa bai over na slopen ya cu kier mantene e estilo monumental y e tereno ta propiedad di Bisdom Willemstad. Nos a duna nos palabra cu na Colegio San Hose na Sta. Cruz nos ta hasi e trabao di slopen di un vleugel y construi esaki bek cu sistema modular, cu ta mas economico,den e mesun forma monumental y despues cu Skoa wak e trabao por duna nos ok pa sigui na Noord. Tur hende cu bishita awe Colegio San Hose no ta ripara e diferencia entre e dos vleugel di e scol. Mi a reserva 3 miyon florin riba presupuesto pa hasi mescos na St. Aloysius, ami convenci cu Skoa lo no nenga despues cu nan por a wak cu nan mesun wowo con bunita Colegio San Hose a keda. Entre parentesis, mi no a wordo invita dor di Skoa pa ta presente na e reapertura di Colegio San Hose siendo cu ta mi ministerio a prepara y ehecuta hunto cu DOW, e tempo ey bao di ex minister Otmar Oduber, full e proyecto, y solamente Minister President a wordo invita.
